Tesla boss Elon Musk chu mi nu ngaizawngah puh a ni mek a, mahse amah chuan a pha thung. Kum 51 mi Elon Musk hi Google co-founder Sergey Brin nupui Nicole Shanahan nen sawi zawm an ni a, thudik a ni em tih erawh hriat a ni lo.  

An chungchang hi Wall Street Journal chuan an tarlang a, hei hi Musk chuan chhangletin, "Brin nen hian thian tha tak kan ni a, nizan khan kan party ho a ni," tiin a sawi. Wall Street Journal chuan Musk leh Nicole te hi nikum lam atang khan an in 'imaita' tawh niin an sawi a, tun hnaiah an inkar hi media lamah a rawn lang chhuak ta a ni. Hetih lai hian Brin chuan an nupa inkar hi tih tawp a duh niin an tarlang bawk. 
 
SpaceX CEO Elon Musk chuan, "Nicole hi kum thum chhungin tum hnih chiah ka hmu a, hengahte hian kan bulah midang an awm ve ve bawk. Inhmangaihna lam engmah a awm lo," tiin a sawi a, a thusawi hian mipui rilru a hmin zo ang em tih chu hriatthiam harsa tak a ni. 
 
Brin leh Nicole te hi nikum December khan an inthen a, mahse an la cheng dun reng tho nia tarlan a ni.  An inthenna tur hi dan hmangin chinfel an tum a, sum tluklehdingawn khat ($1bn) vel a chet dawn avangin an la inrem thei lo nia tarlan a ni. An nupa inkar a buai mek lai hian Musk hming a ri chhuak ta a, tak tak a ni em tih pawh thliar thiam harsa tak a ni. 

Hetih lai hian Elon Musk hi nupui pahnih then tawh, fa pawh 10 lai nei tawh a ni. A nupui pahnihna Talulah Riley nen an inthen hnuah 2018 atang khan Canadian musician Grimes nen an inzui leh a, Amber Heard nen pawh sawi zawm an lo ni tawh - la tlangval zek zek tak a ni.