Manto taka Twitter a lei hnuah Elon Musk chuan thawm lian tak tak a rawn nei chho zel a, Twitter logo hial a thlak ta rup mai! Twitter logo hi sava thlawk lai (blue bird) lem a ni a, hei hi 'X' in a rawn thlak a, brand pawh a danglam ta. 

Twitter logo blue bird kha Twitter co-founder Biz Stone ngaihtuah chhuah, Martin Grasser, Todd Waterbury leh Angy Che ten kum 2012-a an design kha niin, basketball star Boston Celtics legend Larry Bird hriat reng nana a hming chawia an tih a ni. 
Logo thar chu 

Twitter logo thar 'X' hi a var niin, a background a dum thung. American sumdawng hausa tawntaw Elon Musk hian a Twitter profile picture pawh an logo thar hian a thlak nghal a, 'X.com' tih a dah tel bawk. 

Kum 52 mi Musk hian 'Tweets' tih pawh thlak leh a tum nia tarlan a ni a, post pawh "x's" tia thlak tumna a awm leh mek - danglamna kan hmu chho mawlh mawlh dawn a nih hmel hle. Musk hian super app duan chhuah a duh bawk a, a hmingah 'X' a hmang dawn niin an tarlang. Social media platform thlak danglam dawrh a tum a ni ber. 

Twitter CEO thar Linda Yaccarino chuan logo an thlak chhan chu thil thar tih an duh vang niin a sawi a, thil thak danglam nual an tum tih a sawi ve bawk. 

An khing e
Twitter logo thar 'X' hi San Francisco-a Twitter headquarters building-ah lian taka tar nghal a ni a, mit pawh a la he. Hetih lai hian San Francisco thuneitute chuan Twitter lakah hian an logo tar chungchangah complaint an thehlut a, chhui zui mek a ni. Sawrkar thuneitu lam chuan building-a thuziak leh symbol intar reng reng chu tihdanglam emaw thlak a nih dawn chuan phalna lak hmasak a ngai tih an sawi.