UFC President Dana White chuan Elon Musk leh Mark Zuckerberg te chu an insual a nih ngat chuan khawvela fight lian leh ngaihven hlawh ber tur a ni dawn tih a sawi. 

Twitter neitu Elon Musk leh Facebook neitu Mark Zuckerberg te chuan tun hnai khan boruak lian tak an rawn nei a, cage-a insual hial an duh ta riap mai. Mi tam tak chuan fiamthu a nih an ring a, a thlen tak tak pawh an ring lo. Mahse hemite pahnih hian an timai mai hauh lo, UFC President meuh pawh a tawng chhuak ta.

Hemi chungchangah hian TMZ Sports chuan UFC President hi an interview a, an ti mai maiin a ring bik lo. Dana White chuan, "He fight hi a thleng a nih ngat chuan khawvela fight lian leh ngaihven hlawh ber a ni dawn a, pay per view record lo awm tawhte pawh a khum ngei ang. He fight atang hian charity atan pawh dollar maktaduai 100 zet chu a tling khawm ngei ang," tiin a sawi. "He fight hi mitinin an hmu duh dawn a ni," tiin fight ngaihven bik tur a nih thu a sawi. 

Dana White chuan, "Elon leh Mark te hi ka be ve ve tawh a, an nunna atan a hlauhawm thei dawn tih ka hrilh. Mahse thulh an tum phah chuang lo a, kan ti ngei tur a ni," tiin min chhang a ni a ti! Hetih rual hian an in fight hun tur hi official-a puan a la ni lo a, boruak a awm chho zel rih dawn a nih hmel hle. 

Thil thlen chhoh dan
Khawvela hausa ber Elon Musk leh Mark Zuckerberg te hi Thawhlehni atang khan social media kaltlangin an incho tan a, media rintlak tak takin an chanchin hi an tarlang chuai chuai. Kum 51 mi Elon Musk hian Twitter kaltlangin Mark Zuckerberg chona thu hi a chhakchhuak a, hei hi Zuckerberg chuan lo hmuin, "A hmun tur rawn sawi rawh," a tive nghal riap.    

Facebook leh Instagram neitu Zuckerberg hi Elon Musk chuan chhang let ve leh nghalin, Vegas Octagon-ah insual a duh thu a hrilh. Vegas Octagon hi Ultimate Fighting Championship (UFC) an neih thinna hmun a ni a, Las Vegas, Nevada hi UFC tan chuan an hmunpui a ni. He hmunah ngei hian Elon Musk leh Mark Zuckerberg te hi insual an duh - incho tak an ni. 

American sumdawng hausa tawntaw Elon Musk hi a tawng pawr hle a, move bawn turu tak 'The Walrus' te pawh a thiam a nih hmel. Kum 39 mi Zuckerberg pawh a awm mai mai bik lo - Mixed Martial Arts (MMA) a training thin! A training hi a hmang chhuak nghal a, tun hnai khan jiu-jitsu tournament-ah hnehnate pawh a chang a ni awm e - pui miah miah dawn. 

An khawsak dan atang hian an inkar boruak a tha lo hle tih hai rual a ni lo a, hemi atan hian an lo inbuatsaih viau te pawh a ni mahna - eng nge thleng zel dawn thlir zel phawt ang.