DOWNLOAD OUR APP

Read latest news on your phone
app-store
Embiid-a’n kum 51 hnuah Kareem Abdul-Jabbar-a tluk
Dec 21, 2023

Joel Embiid chuan tun season kal meka a vawm luh tam ber thlengin Philadelphia 76ers-in 127-113-in Minnesota Timberwolves an hneh a, point 51 vawm lutin rebound vawi 12 a nei bawk a. Kum 51 liam taa Kareem Abdul-Jabbar-a record siam a tluk ta bawk.


Kum 29 mi hi Abdul-Jabbar-a hnua khelh 12 chhung a zawna point 30 chuang leh rebound vawi 10 nei tling ziah thei leh hmasa ber a ni.


Abdul-Jabbar-a hian Milwaukee Bucks tan a khelh laiin NBA record a siam a, kum 1972 khan inkhel vawi 12 zet hetiang zat point leh rebound hi an lo nei tawh a, a hnu zelah pawh kal zelin inkhel vawi 16 zet a tlin thei.


NBA Most Valuable Player (MVP) ni lai, Embiid-a hian Sixers hi inkhel vawi riatah vawi sarih zet a chakpuina a ni ta bawk.


Cameroonian hian first half chhungin point 20 a thun hman a, quarter linaah a career-a a vawi sarih nan point 50 a thun tling a, tun season-a a vawi hnihna a ni bawk.


Western Conference-a hma hruai mektu, Timberwolves chu inkhel vawi nga chhunga an tlawm hmasak berna a ni ve thung.


Embiid-a hi NBA-a top scorer a ni mek a, inkhelh apiangin point 34.4 thun ziah ang ni mekin Sixers player zingah Wilt Chamberlain-a’n kum 1967-a a zawna inkhel vawi thum point 40 leh rebound vawi 10 neih hnua nei leh thei hmasak ber a ni.


Tyrese Maxey-a’n Sixers tan hian point 35 a thawk chhuak bawk a, Embiid nen an inkawp fuh hle.


Hetih lai hian Boston Celtics chu Eastern Conference-ah 21-6 an ni ta a, Sacramento Kings lakah 144-119-in hnehna an chang.


Jaylen Brown leh Derrick White chuan point 28 ve ve thawk chhuakin top scorer leh rebounder Jayson Tatum erawh a a keartui a tihnat avangin a inlan thei lo.


LA Clippers pawhin Dallas Mavericks lakah 120-111-a hnehna changin a zawnin vawi kua an chak ta a. Kawhi Leonard chuan Clippers tan point 30 thawk chhuakin rebound vawi 10 a la bawk.


Hetih lai hian NBA MVP vawi hnih ni tawh, Nikola Jokic chuan NBA champions Denver Nuggets tan point 31 thawk chhuaka rebound vawi 15 la bawkin Toronto Raptors lakah 113-104-in hnehna a chakpui.

Euro 2024 final opinion poll
Euro 2024-ah hian tunge champion I rin?
Spain
England

Latest News & Chhiar Hlawh