Aizawl August 2, 2024 : Vawiin khan Congress party chuan Congress Bhavan, Aizawl-ah Friday political session an hmang a. He huna thusawitu MPCC Treasurer Dr. Lalmalsawma Nghaka chuan, "Enchhin sawrkar, kalphung thar sawrkar kan tih hian mipuite a tibeidawng," a ti.

"Enchhin sawrkar, kalphung thar sawrkar kan tih hian mipuite a ti beidawng hle a. Sawrkar kalta ten an tihngam loh tur an rawn ti chho mawlh mawlh mai a ni. Sum inrenchem austerity measures tih te leh ZPM inhmehlohzia te hi tun hnaiah mi ten an sawi nasa viau a. Hetah hian ZPM hotute sawrkar a fawngchelhtute chhia leh tha hriatna an hmansual avangah ka ngai," a ti.

MPCC Treasurer chuan, "Minister of state rank 7 an awm a, adviser panga te, secretary rank an awm thluah a, consultant te an awm a, Board chairman duhsak zawng an indah hmiah hmiah a, heng ho zawng zawng ken telin sum a sen tur hi Cheng nuai Rs. 134145.84 a ni a. Austerity measures an tih vel leh heng an kalpui dan hi thil inhmeh lo tak a ni. Mipui te phurrit siam belhin MNF Sawrkar tih ang bawkin Petrol leh Diesel a chhiah a pung thur thur," a ti.

Buhfai supply chungchang sawiin, "Buhfai supply tu thlan danah ringawt pawh austerity measure an lak loh zia a chiang hle a. RL Store, a chhang hniam berin quintal-ah Rs 3,400.50 in a chhang a, LZ Juice quintal 3550 a chhangtu hnenah an pe ta zawk a, hei avang hian kum tin Cheng nuai 790 dawn sawrkar in a sen belh dawn ta a ni," a ti..

Sawhthing chungchang sawiin, "Ram pumah mipui kan rum mek a. Sawhthing chingtute’n an sawhthing a tam avanga rum an tam hle a, vawk vulhtute an rum bawk, kan kawngpuite hi a chhe lutuk. Heng kan harsatna tawh hrang hrangte hi tu sutkiang turin eng nge kan tih? Sawrkar hmasa te puh lovin mahnia tih ve mai hi hruaitu tha tih tur a ni. Mipuite harsatna sukiangtu ni turin ram hruaitute hi an intihhniam a ngai a, Congress party chuan mipuite hamthatna kan thlir hram hram thin a, a chhe lai siamthat turin theihtawp kan chhuah thin a ni. Kum 2018 ah khan Congress hi sawrkar chhunzawm ta ila, tuna kan sawi nasat em em Skywalk leh Ropeway te hi a hlawhtling ngei ngei ang," a ti.

"ZPM te ka challenge duh chu hei hi a ni. Congress chuan mipuite tan hna kan thawk thin. Tun anga an kal mai mai chuan engmah kan ni dawn lo. Zoram mipui chhanchhuak leh turin Congress hian theihtawp kan rawn chhuah dawn a ni," a ti bawk.