November 13, 2023 : Aizawl khawpui chhung hmun thenkhatah Adaptive Traffic Control System hmangin lirthei che vel khuahkhirh a ni a, vawiin atangin enchhinna kalpui a ni.

Aizawl khawpui hmasawn zel theih nan Aizawl Smart City Ltd-in traffic enkawlna felfai leh tha zawk a awm theih nana a ruahman - Adaptive Traffic Control System (ATCS), traffic signal light (a sen, a eng leh a hring) hmanga lirthei tlan dan enkawl na tura Bazar Bungkawn leh Bawngkawn, Sairang penga a dah te chu vawiin 13.11.2023 (Thawhtanni) atangin inzirtirna leh enchhinna neih a ni a. He enchhinna hi chawhma dar 11 atanga chawhnu dar 3 thleng neih thin tur a ni.

He enchhinna hi tluang taka kalpui a nih theih nan leh traffic signal light hi Aizawl khawpuiah engtiang chiaha hman tur nge hriat a nih theih nan lirthei khalhtute’n a hnuaia traffic signal light awmzia lo hre thar tur leh Traffic Police duty-te thu ngaichang turin kan inhriattir a, enchhin laia signal light zawmlote chu MV Act hnuaiah hrem theih an ni ang. 

Traffic Signal Light - A awmzia leh tihtur

Rawng sen (Red) - Signal light chu a ‘sen’ chuan lirthei tlan laite chu din tur a ni. Kawngpui vang tan zawnga rawng vara rin; STOP tih inziahna ah din tan tur a ni ang. 

Rawng eng (Yellow) - Signal light chu a ‘eng’ a nih chuan tlan mai thei tura lo inrin tawh tur a ni a, kan lirthei te tihnun tur a ni.

Rawng hring (Green) - Signal light chu a ‘hring’ a nih chuan tlan tur a ni.