ZALEN January 5, 2025: Excise & Narcotics Department Mamit te chuan vawiin hian Pathian hnena lawmthu sawi inkhawmna hun an hmang. He huna report a nih danin nikum chhunga Mamit END hnuaiah case ziahluh 323 a awm a, hemi kaihhnawih-ah hian mi 221 man an ni. Thalai/tleirawl mi 416 te hnenah ruihhlo ti lo tura intiamna Certificate an hlan.

He hun hi Rev. Daniel Lalmalsawma Sailo, Hmunsam, Bialtu Pastor in a hmanpui a, END Mamit te kumthar chibai bûkna leh fuihna thu sawiin - kum 2026 ah hian ruihhlo dona hna thawk turin Pathianin nunna min pe leh a, hemi hna kaltlang hian Pathianin eitur min pe a, Pathian leh ram tan rinawm leh dik tak a thawk turin END Staff te a chah a, tin, mahni hna a tui lo te hi mi khawngaih thlak an nih thu a sawi bawk.

Hemi hunah hian END Mamit Asst. Commissioner Lalsangzuala Ralte chuan kum 2025 chhunga END Mamit Achievement report pek pahin Mamit District chhunga NGO te leh Kohhran hrang hrang te nen thawhhona tha tak an neih avangin lawmthu a sawi a, ND&PS Act 1985 leh MLP Act 2019 hnuaiah hetiang hian ruihhlo chi hrang hrang man leh case register a nih dan a sawi.

1. No. of cases registered - 323

2. No. of persons arrested - 221

3. Heroin seized - 49.080 grams

4. Ganja - 3024 grams

5. Codeine based cough Syrup - 50 phials

6. Alprazolam - 255.420 grams

7. Rakzu - 2048.375 litres

8. Zu bilhlai - 4927 tins

9. Sap Zu - 103.500 litres

10. Beer - 129 can

11. Grape Wine/Juice - 36 bots

12. Zu thlawrna bel - 103 nos.

13. Lirthei - 7 nos.

END Mamit te hian Thawhtanni tuktin a Devotion an neih atanga thawhlawm tlingkawm hmangin natna khirhkhan tuar chhungkua pahnih bakah Mamit District Hospital Poor Fund atan Krismas dawn khan thilpek an hlan bawk a ni.

END Asst. Commissioner Lalsangzuala Ralte chuan Mamit District khaw hrang hrangah Drugs Awareness Campaign an neih thin thu sawiin, Tripura State chhunga Zampui tlangdung ah te hemi chhung hian Drugs Awareness Campaign an neih tawh thu a sawi. Drugs awareness kaltlang hian ruihhlo la ti lo thalai/tleirawl mi 416 te hnenah ruihhlo ti lo tura intiamna Certificate Department in a pe theuh bawk a ni.