Sawrkar chuan nimin khan thuchhuah siamin kar khat atan Lockdown chu an puang leh ta chu a nia, hei hi hripui vei an kiam hleih theih loh vang niin a lang a, he hripui hian engtikah nge min kiansan dawn chu hriat a ni lo. Hri vei kan pun chhung hi chuan Lockdown hi kan pawtsei zel mai dawn nge, hei bak hi chu sawrkar hian tih dan kawng  a hre lova ti lo thei lo kan ni zawk.

Hripui len tirh khan  ram changkang leh hausa zawk khawthlang ram ho te chu an inthunun thei lo lutuk leh zalenna an dah pawi mawh lutuk avangin hri kai an pung chak hle a, duty te tawng duh khawpin pawnah an chhuak lui a, hri kai pawh an tamin damdawi thiamna lamah leh inenkawlna an nei tha viau chungin thi an tam hle. Keini lam pawhin sap ho lo mawl zia tih te chu kan tawngkam a ni a, kan Indian pui ho lah tih ngaihna awm lo khawpa inthlahdah an nih avangin kan nuih zat viau bawk.

Tun dinhmunah erawh India ram hmun hrang hrangah hri kai an tlahniam zel a, khawthlang ram ho te phei chu an inhawng zau ta hle hlawm a, infiamna lamah phei chuan ram inelna leh mimal inelna an kalpui chho tan ta mup mup a. Intawllenna hmun te pawh an hawng chho ta zel a, keini lam kan in-lockdown zel thung. Eng chen nge lockdown hi kan kalpui ang. Anni hian engtin nge he hri hi an thunun bik le?.

Kan nunna a pawimawh tluk zet hian kan economy hi kan nunna a ni tel tih hi ngaih tuah a tul . ‘Inkharkhip avanga sum leh pai lakluhna buai ve miah lo ten thutlukna an siam thin hi chu a buaithlak a ni,’  tia sawi duh hial te pawh an awm ta. Chanchinthar lamah inkharkhip chungchang thlir hona neih a nih thu kan hre zut a, mahse, tun thleng hian hmalakna tha zawk hi kan la ngaihtuah chhuak lo chu a nih hmel.  Hri vei leh vei lo test tam kan ngam bawk si lo, vaccine lak a buaithlak rih viau bawk si nen, eng chen nge kan inkharkhip ang? tih hi ngaihtuah tham a tling.