ZALEN August 18, 2026 : Food Civil Supplies & Consumer Affairs Department Minister B. Lalchanzova chuan vawiin khan Indane EXTRALITE NOW FTC Gas cylinder chu mipui vantlang hman theih turinState Guest House, Chaltlang-ah a tlangzarh.

FCS&CA Department Minister B. Lalchhanzova chuan IOCL ten englai pawha lei theih tura Indane EXTRALITE NOW FTC gas cylinder an chhawpchhuak ta chu lawmawm a tih thu a sawi a. Eirawngbawlna gas indaihloh avanga dan loa (black) gas lei thin chu hei hian a tihziawm a beisei thu sawiin, Indane EXTRALITE NOW FTC gas cylinder chu Mizoram sawrkar hnuaia subsidy anga pek tur a nih loh avangin, a man pawh a leitute mamawh ang zel (market-based) a nih tur thu a sawi.

Indane EXTRALITE NOW FTC gas cylinder hi hman awlsam leh nuam zawk tura siam a ni a, gas cylinder pangngai aiin a zan zawk bakah, a chhung lang tlang thei tura siam a nih avangin gas tui awm zat a hmuh theih a, hei vang hian refill hun tur pawh hriat theih a ni dawn a. Gas cylinder thar hi 10 kg composite cylinder (fiber glass) hmanga siam a ni a, tuiek (rust) ve lo tur leh kangmei chhuak thei lakah pawh him zawk tura beisei a ni.

Indane EXTRALITE NOW FTC gas cylinder hi hmang tura in-register leh refill duhte tan IndianOil ONE App leh IndianOil Customer website (cx.indianoil.in) atanga tih theih tura ruahman niin, Whatsapp booking pawh tih theih tura hmalak mek a ni a. In-register man hi cheng 4900 vel niin, a refill man hi cheng 1800 vel ni tura ruahman a ni a. Tun dinhmunah chuan MIZOFED leh Vanbuangi agency ten an pe chhuak dawn a ni.