DOWNLOAD OUR APP

Read latest news on your phone
play-store app-store
app-store
Engkim hi in ta a ni si a
titi ZALEN
Aug 30, 2020
ad
  • Vanroluaha Tuallawt
  • Khawvel kan awm chhungin chhiat ni that ni nei thinte kan ni. A enga mah kan duha kan duh loh avanga nei leh nei lo thei pawh kan ni lo. A tlangpui thuin vanneihna leh thatna lam hi a dawnsawn a nuam a, kan hre thiam tlangpui. Chhiatna lam erawh hriat thiam har kan ti. Kan ta ni si heng - natna, hlauhna leh a dangte hi, kan ta ni lo se kan ti. Nimahsela, Pathian chuan a ropuina min hmuhtirna tura a remruat lo ni si, a nihna lai hi kan zir thiam a va tul em!
  • Kan tun lai hun tawngah kan duh reng vang ni lovin, tul leh pawimawh tia kan vahvelna lamah, Covid-19 kai thei dinhmunah kan ding ta reng mai. Kan in chhungah ngei pawh tute emaw avang leh eng thil emaw avangin kan kai thei ta tho mai, himna a chep sawt ta hlein a lang.
  • Tuna hri vei mekte pawh hi, an tum reng leh an duh avanga kai an ni bik lo tih chu kan hre theuh awm e. Mi dangte tichiaia kai chhawntirtu an ni ang tih pawh an ngaihtuah bik hauh lo vang. Kai dawn tih inhre sa sela chuan a pumpelh nan chaw nghei hial pawh an thlang zawk ngei ang. Chutih laiin, an lo kai ta hlauh si a, pawi tiin, anmahni chuan tuar lo inhuam tehreng pawh ni sela, an chhungte thlabar leh mi dang an tihbuai leh hlauthawnga an siamna zawng zawngte hi pawi an ti a, an thiam loh ni bik lo mah sela, an inthiam loh ngawih ngawih a ni.
  • Hetiang dinhmuna an din lai hian, mi thenkhat chuan chhanchhuah hna thawkin, an nunna hia lthapin, ral hmatawngah an awm a. Chutihlaiin, thenkhat chu, kan hlauh lutuk vang nge, mahni hma kan sial vang; anmahni thlamuan leh khawngaihna lantir aiin, thiam loh kan chantira, thil sual lian tak ti ang hialin kan ngai a, kai pawh ni lo rinhlelhawma langte thleng thlengin, tawngkam hriat nuam lo leh demna thuin kan umzui a, an rilru kan tihnat lehzualna tur lam pawh kan hre changta lo niin a lang (demawma awm, mipui himna pawisa lem loa awmte chu an awm theih awm e, he lam chu kan sawi tumah ngai lo ta ila). Hei hi thil pawi tak a ni. Pathian thu atanga teh phei chuan a Kristian rilru chiah lo a ni. Pathian thu chuan, ‘Taptetahpuia, lawmte lawmpui’ turin min ti. ‘In tawngka chhuak chu chia al, khawngaihna tel ni fo rawh se’ a tih hman hun lai tak a ni.
  • He hri mak leh hlauhawm tak lak ata tun thlengin, kan chhungkua kan him a, ei leh barah kan tlachham lote hi Pathian khawngaihna kan dawn leh a vehimna a ni, Pathianah kan lawm. Swab Sample test paltlanga kan him (negative) ngat phei hi chu tunlai chhanah, “Pathianin thil ropui min tihsak,” kan tia kan lawmna a sang hle. Hetih lai hian hri lo kai palhin, kan beisei loh harsatna hian min man ta sela, Pathian rem ruat kan chunga lo thlengah kanngai thei ang em?
  • Ka tawrh hi Lalpan a phal, vui thei ka ni lo.
    “Dam chhung mi hmuak apiang i tirh ni se, kan ti thei a ngem?” tih kan inngaihtuah thar a tul hle awm e. Nu pakhat, Pathian faka lâm lâm thin pawh, Chiahpuamah khan a pawisa nuai hnih/thum vel a chiah ve a, “Kha ta tang khan ka lam thei ta hauh lo” a ti. Harsatna kan tawh loh avanga ringtu tha anga lang mai kan ni em? tihte hi tun lai chhanah kan inenfiah thin a tul hle mai.
  • Pu R.Lalbiaksanga chuan, “Pathian thuin ‘engkim in ta a ni si a,’ a tih angin cancer ka ta chu ka lo vei ta,” a ti. Vawiin ni thlengin Pathian thu a la au chhuahpui zel, a entawntlak hle mai. Pathian thuin a sawi ang hian keini pawh, engkim mai hi kan ta a lo ni, kan chunga thleng thei vek a lo ni. Khawvel emaw, nunna emaw, thihna emaw, thil awm sa emaw, lo la thleng zel tur pawh kan ta vek a lo ni. He hri hlauhawm tak pawh hi, a vei mekte ta bik a ni lo va, kai thei vek kan ni, kan ta a ni. Pathianin tul a ti a nih phei chuan, eng ang pawhin biru mah ila kan kai tho tho ang. Kai lo tura min duh a nih chuan, hri darhna hmunah pawh kan him tlat thei. Chuvangin, tumah hi indem tur kan awm lo ve. Kan lo kai palh a nih pawhin Pathian remruatah ngaiin a hnenah tlu lut ila, Pathianin engnge min hmuh chhuahtir a tum tih ngaihtuahin, hmuh chhuah ngei pawh tum ila, chu chu kan damna tur leh kan hahdamna tur a ni. Kan him zel a nih pawhin mi dangte dem nan hmang lovin, Pathianah i lawm deuh deuh zel ang u.
  • “Heng hreawm tuarna avang hian tumah an nghin lohna turin, heng hi tuar tura ruat kan ni”(I Thes 3:3).

Latest News & Chhiar Hlawh