Premier League champions nih inchuh mek, Manchester City leh Arsenal chuan season tharah Champions League an khel dawn tih an chiang tawh a. Newcastle leh Manchester United-in an zawm thei dawn em a la chiang lo.

Liverpool-in Pathianni zanah Tottenham hnenahin an lehpel nghal a, panganaah an awm.

Premier League-a pasarihna thlengin season lehah Europe-a inelna an khel phak dawn.

Tute nge Champions League-ah?
City chu Champions League nomawi la thei turin an inchhawp hnai mek a, Arsenal nen an chiang tawh a, Liverpool-in beiseina an nei sang thar mek.

Jurgen Klopp-a team hian a sang pali thleng tur erawh chuan Newcastle emaw, Manchester United emaw an lehpelh a ngai dawn.

Liverpool tan kawng a hautak tawh khawp mai a, an khelh hmabakah an chak vek a ngaih bakah Newcastle-in khelh nga an la neiha point ruk an hmuh phak loh a ngai a; United-in khelh riat an la neihah point riat an hmuh phak loh a ngai bawk.

Data experts Nielsen’s Gracenote chuan a sang pali zinga Liverpool tel theihna chance hi 12% chauhvah an dahsak mek a, Newcastle (92%) leh United (96%) chu tel tura rin an kai rih hle.

Newcastle leh Tottenham winger hlui, Chris Waddle chuan, “Liverpool tana a sang palia tel chu a hautak hle tawh dawn a; mahse, Liverpool an ni miau mai a, anni aia he chona hmachhawn tura duhthlan tur dang an awm chuang lo,” a ti.

“Hetih rual hian Newcastle leh United khelh tluan dan kan hria a, kawng chu a khirh,” a ti.

Champions League an khel phak ang em tih zawhna chu Klopp chuan, “Tunah chuan a theih loh chiang. United leh Newcastle hi an chak vek chuan engtin nge kan theih ang? An chak lo a nih erawh chuan kan hnaih sawt dawn a. Tunah chuan Europe-a inlan ve ngei tuma khelh apianga hnehna chan a ni rih phawt mai.

“Brighton pawhin kartawpah khan an khel tha em em a, ka hmuh tawhah chuan an khelh that ber tum a ni a. Roberto de Zerbi hnenah pawh ‘wow!’ ka ti.

“Kan hnuaiah awm mah se vawi hnihin an khel tlem zawk a. Aston Villa pawhin hma an sawn nasa a, kan hnuaia kan awmtir tluan thei a nih chuan chu ringawt pawh chu hlawhtlinna a ni ang,” a ti.

United-in Pathianni zanah khel tha tluang tak, Villa hi si khat faiin an hneh a, boss Erik ten Hag chuan a sang pali zingah an tel phak ngei a ring.

“Phurna sang tak kan lantir leha table avanga kan hnual loh a ngai a ni,” a ti.

“A sang palia tel tura intlansiakna hi kan kutah a awm vek a, keimahni thu leh chet dan azir a ni,” tiin Champions League an khelh phak ngei a ring hle.

Europe League ve thung
Premier League-a panganain Europa League hi an khel dawn.

Pathiannia Tottenham an lehpelh hnuah Liverpool chu he dinhmun luahtu an ni mek.

Spurs leh Villa aiin point hnihin an sang ve ve a, anni aiin khelh khatin an khel tlem zawk bawk a; mahse, Brighton an la awm.

Pariatna daihah de Zerbi team hi awm mah se Liverpool aiin point li chauhvin an hniam a, vawi hnihin an khel tlem zawk bawk.

Nielsen’s Gracenote chuan panganaa Liverpool an awmna chance chu 87% laiah a dah tho va, Brighton (48%) chuan dawtin Tottenham (38%) leh Villa (15%) aiin rin an kai zawk.

Champions League khel phak tura rinkai, United hi palina an ni phak lo hlauh a nih chuan parukna pawhin Europa League an khel thei bawk ang.

FA Cup final-ah Manchester team hnih an inhmachhawn dawn a, champion-in Europa League an khel thei a, khawi zawk zawk pawh champion se Champions League lam an thlan hmel.

City hi champion lo mah se league-a an dinhmun avangin Champions League-ah an inlan dawn a, hei vang hian FA Cup la lovin final-ah tlawm zawk pawh ni se, United tan Europa League-ah hmun a awm dawn a. United hi league-a palina an nih phak leh bawk si chuan Europa League ai chuan inelna sang zawk an khel zawk dawn a. Palina hi an ni phak lo a nih chuan Europa League-ah inlannin league-a dinhmun azirin England atangin hmun khat thawh belh theih a nih phah ang.

Heti a nih chuan Liverpool, Tottenham, Villa leh Brighton tan bakah pakuanaa awm mek, Brentford tan pawh kawng a la awm thei dawn a, anni hian parukna ni mek chu point liin an phak lo mek.

Europa Conference League-ah tute nge ni ang?
Carabao Cup-a champion-in an khel thei a, United an ni a, parukna chung lamah an awm a nih chuan Champions League emaw, Europa League emaw an khel zawk thei dawn a, chuti a nih chuan pasarihnain an khel thei dawn tihna a ni.

Pasarihna hi Europa League khelh phak tuma bei mekte zinga mi hi an ni thei vek a, pakuana Bees pawhin remchang an nei thei a, Nielsen’s Gracenote erawh chuan pasarihna nih theihna chance hi 1% chauh a pe thung.

Tun dinhmun atanga a lan dan chuan 10-naa awm, point kuaa pasarihna phak lo mek, Fulham chu season tharah Europe-ah kan hmuh a rinawm ta chiah lo a ni.

Europe-ah English team riat maw?
West Ham United chu a sang 10 zingah an tel phak hmel tawh rih lo va; mahse, Europa Conference League semi-final khelh hmabak an la ni a, an champion hlauh a nih chuan season lehah Europa League-ah an inlan thei dawn. Europe-ah England-in team riat an thawh theih phah ang.

Nielsen’s Gracenote chuan an champion theihna chance hi 35% laiah dahin team pali la dam zingah chance nei sang ber an ni a, an dawtah Italian club Fiorentina (33%) an awm bawk.