Manchester City chu English Club zinga kum khat (calendar year) chhunga nomawi panga la thei hmasa ber an ni ta.

Zirtawpni zan khan Fifa Club World Cup final-ah Brazilian club Fluminense chu si li faia hnehin kumina an nomawi pangana an la a ni.

Season liam taah Treble champion niin Premier League, FA Cup leh Champions League nomawi an lak hnuah August thla khan Uefa Super Cup an la leh a. Tunah nomawi dang an la leh ta bawk a ni.

Saudi Arabia-a hnehna an chan rual hian Manchester United, Liverpool leh Chelsea hnungzuiin English club zinga Club World Cup la thei zingah an tel ve ta chiah bawk.

European champion an nih avanga inelnaa tel, Pep Guardiola team hian final-ah hian bul an tan tha hle a, minute khatna lekah Nathan Ake-a’n goal ban a pet per let chu Julian Alvarez-a’n a awmin a lo su lut a, hma an hruai nghal.

Minute 27-ah Phil Foden-a vawrh luh chu Nino-a’n an lamah lo dang lut palhin City-in hma an hruaina an belhchhah.

Khel tha tak Foden-a hi goal thuntu zingah a hming a chuang zui ta tho va, minute 72-ah Alvarez-a thawh rah a seng a. Argentine forward hian hun tawp dawnah an goal lina a thun leh bawk.

City tana Zirtawpni zana nomawi lak hi a lawmawm rualin khel tha tak dang, Rodri chu second half tawp dawn lamah hliam vanga lak chhuah a ni a, a dinhmun chiah la hriat theih a ni lo.

Club World Cup-ah hian Zirtawpni zan vek khan pathumna dinhmun inchuhnaah African champion, Egyptian club Al Ahly chuan 4-2-in Asian champion, Japanese club Urawa Red Diomonds an hneh bawk.