Khawvel a ni miau si a, a hlim reng theih bik si lo va, kan nun a tluang reng thei hek lo,lawm ni a awm a,lungngaih hunin min tlakbuak hun a awm miau si a,  Kan ngaihdan lova kan awm chang a awm a,kan ngaihdan kan dah lal ber chang a awm bawk a, mahni hriatna lo chapopui tawk, mi dang hneh tum hram hram kan awm nuk bawk si a, ram hruaitu kan duh taka kan thlan lal ho lah lal thuthleng an luah tawh hnu chuan mipui duh dan ai mahin an duh danin an kal pawp pawp em ni?tih tur an ni. Rorelna hmun atangin “ kei ber emaw” an tih chang a awm a, a thlangtu mipui lah kan fing teh lua si lo. Inkhualtelem hi kan va ang tak em! Politics kan ngaihdan a dikloh chuan engtikah mah ram hruaina hian hma a sawn ngai dawn lo  : Mi huaisen leh mi dik, mi rinawm kan ti thin a, a dik reng mai, hetiang mi ni awma langte chu kan thlang chhuak reng tawh a ni lawm ni? Nge kan rin ang an lo ni lo leh thin tih hi ngaihtuah tham tak chu a tling ngei ang. Inthlan hun a lo thleng ang a, a ngaite ho bawk an rawn au leh chuah chuah dawn a, kan mi duh lo, kan mi ngei em em te kha an zia an rawn thup leh dawn tih hi a chiang reng mai. Ze thlak nun kha an rawn keng leh dawn a, an rorelna thalo tak nia kan hriat thin kha an rawn au leh dawn a, an rawn insawimawi leh dawn ania aw? Chu hun lo thleng tur chu a ni pawimawh em em mai chu, kan hruaitute rinawm loh vang nia kan hriat te, kan thlan chhuahte mizia danglam tak nia kan hriat te, rorel lai leh eptu nungchang in ang lo, a hnua an dinhmun inthleng avanga an chet zia pawh danglam mai thin hruaitute hi kan duhkhawp lo ngawt mai, eptu an nih laia thinrim engphiara rorelna zahawm taka an ram leh mipui tan ni awm taka an auh lai te, “ A ni zet hi chu a tha mange aw!! Rorel lamah han thu chiah sela, ram tan hna a thawk tha ngawt ang” tiin kan lo fak a, hun a lo kal a, rorelna rawn inthlak ta chiah a, mi tha tak nia kan hriat, rorelna zahawm taka au thin kha, rorelna lam thuthlengah a thu ta a, a hnathawh chak vak lo te, a hna thawh duhkhawp lohna te a thang hut hut ta mai a, rorelna in zahawm takah a hmaa eptu dinhmuna a din laia an rawn nawr ang chiah khan an rawn nawr ve ta, tah zet chuan eng ruai a lo ni lo ve…tiin mipui lam an phunnawi ta, “ Kan politician te ho hi tumah rintlak reng an lo awm lo ve, thu chauh an sawi a,ram tan hna an thawk chak lo va, mahni an insawimawi reng si a.” Kan pawr hluai thin a, ram leh hnam thutak buaipui ngai kan pai rei peih lo, chianlohna riau kan nei. Pawnlang taka keimahni nuam tih kan um mai thin ang hian kan nun pawh hian thil tak tak buaipui hi a peih lo a ni ber mai. Kan hmuh leh kan hriatte hi mahni tana tha, tun maia ka hlawkpuina tur, ka awm hmuna ka hlawkpuina tur anih dawn phawt chuan ngaihtuah fima ngaihtuahna pawh hmang tawk lovin kan luhchilh rup rup thin te hi chhungril ngaihtuahna kan hmanloh zia a ti lang hle a ni. Politics tuinu tak avangin kan ram nunphung chenin kan chhiatphah tih hi kei chuan ka hmuh ve dan a ni tlat pek mai, kan rilru kalphung te duhamna lamtluangah min khalh sauh sauh a, mitha pawh inhmu fiah thei lek lovin kan mit meng min tifiah lo va, thawhrimna na aiin awlsam taka thawh chhuah min kawhhmuh a, hna thawh dawn pawhin sawrkarah hlawkna lam hlir min thlir tir a, chumi ka thawh chuan a chanve in ka zo vang, a chanve chu ka hlawkna tur tih te, politics kan khel ve teh ang kan tih chuan rilrua lo lang nghal chiang em em mai chu, “ A hlawkna ka tel hunah chuan? Kan sawrkar ve tak hlauh chuan?” tih rilru atangin sum leh pai hlawkna, hausakna hlir rilru-ah a lo lang nghal uar uar mai thin a ni. Thuneihna leh lalna tiang lek kawh chunga ram hmangaihtu dik tak ni awm taka awm te chuan kan hnam hi a rukin min lo ei chhe zel hi a lo ni a, sum duhamna chuan kawng thui tak min zawhtir a,kan fate-ah a rawn lang a, that chhiatna leh intihveina, mahni thawh chhuah pawh ni lo, chhungte thawh chhuah sa a lo inlak milen te,zirna lamah sum tam tak kan seng, kan thalaite chuti teh ual an ni lo, kan thenawm state thalai ten min tlan khalh zel. Kan thalaite ruihtheih thilah an buai luai laui laiin thenawm thalaite chu an meng fimkar mai si a, min nuihzat a, nuihzat nih chu kan duh lo va, engmah ni si lovin kan inti changkang lawi viau si anih hi!! Kan duh loh thil a lo thlen chang pawhin kan pawr hluai thin a, ram nghawr nghing khawp thu a awm changte hian rin ai takin kan daih rei lem thin lo va, pawl hrang hrangten aw an rawn chhuah ve ngial thin, “ A tha dawn e “ tia kan lo chan khar khar lai leh inlungrual thap ang aw tia kan lo insanphek ve viau laiin chu thu kan khel chuan a daih rei lo hle thin. Boruak hmasa inhriatthiamna a awm chuan kan duh tawk daih zel nia, rei kan daih lo va, kan ngawihsan leh daihna thin hi eng kan tizo ta nge!! Hei tak hi a ni ka mizo pui,ka hnam pui, roreltute ngei ngei pawh hian a mite siamthat ai chuan kan ze pawnlawi deuh hmang hian mahni hlawkna lamah an lo hailut chat chat thin. Keimahni leh keimahni hi kan invaw thlu phengphung ni ber hian ka hre thin. Pawr hluai a, rei daih si lo…. Kan chapo, belhchian kan dawl bawk si lo… Belhchian kan dawllo lutuk hi a ni buaithlak em em thin chu, mahni tawkah tling leh tha, thiam kan inti hle a, miten min hre ve deuh nia kan inhriat chuan kan hawi pawr viau zel a, mi tam tak chu zia kan thlak thul, kan dinhmun a lo that chuan ‘Mahni hmalam nun thlir miah lo va, dinhmun thar thiltihtheihna hman phet tum, a dinhmun hmasa atanga a lo sawisel ve thinah khan an awm ve chat a, a duhloh thin kha amah ber chuan nuam an leng piap piap mai’… Kan chapo na hian kawng dik kan zawhna tur pawh a dal fo thin a ni. Mi tam tak chu kan thusawi ang hian kan nun chhuah pui thei lo va, hei hi a ni kristian nun harsatna chu !!! Kristian tha inti siin hlauh tur kan zawng ruai nite hian a lang…Pathian thu-in kan nun a chiah a,hetah hian mi tam zawk chu mahni awmna kohhran duh tawk lovin an so liam mai thin a, pawl ram a him lo an ti a, an chhuak khawm laih laih a, pawl chu an din leh tho a, Bible chang mahni thu-a lakawiin hun chungchangah an hmanhmawh a, khawvel hi rei tawh dawn loah an ngai a, chu chuan an ngaihtuah fimna tur pawh nasa takin a bawhbuai a, a thenin hlauh tur an zawng ruai ruai a,Bible chang thlurbing an nei a, chu chu vung takin an la mai thin a ni.Pathian thutak buaipui ai mahin an mahni ngaihdana khawvel an thlirna chuan chak takin a kalpui tlat a, an inpal tlu bawtrh bawrh a, an hliam pheng phung nite hian a lang. Kan ram hi chhanchhuak turin keimahni theuh hi kan va pawimawh si em!! Hnam tungding turin i harh ang u. Ram siamtha turin hruaitu thlan dan kawngah fimkhur ila, Party tin ten thu tha pui pui an rawn chhak chhuak leh ngei dawn ania, I chhinchhiahna kha rilru fim hmang la, nangmah an rawn tilawm dawn che a, chu chu kan ram tana thatna tur a ni em? Thu tha pui pui zingah khan kan nun chhiatna tur thuruk a inphum em? Nuamsa taka sum thawh chhuah, awlsam zawnga intodelhtir tum hmalakna tuin hmanrua an rawn nei mai thei asin, heng ho hi chu hlau tawp ang che. Min kai harh a, harsa pawh nise, kan nun chhuah lehna tura kan tanrualna tur, chak lo te, kal ngaihna hre lo te, nun zawia uai thla tawh te, beidawnga lungngaite chhan chhuak tur te, thatchhiatna ruama min luhpui mekna atangte, duhamna avanga kuttling lova pawisa lak duhna ruam atanga min chhan chhuak turte, rilru dik lo siam tha tura entawn tlak hruaitu tha ani kan mamawh ni. Pathian thu a ni emaw eng pawh nise,thatpuina tur thu chu kan infah mawlh mawlh thin a, mahse, a tak ramah hian kan tla bal tlat si hi a mangan thlak ber chu a ni.Chhungkua mamawh sum thawh chhuah teuh teuh pawh a ni ber lo tih kan ram darthlalang atang hian a lang reng tawh si a, sum haichhuahna kan rilru a len em avangin chhungkua kan sawp rawp a, sumin chhungkua a diklo zawngin min han nuai vir tak tak chu kan buai nuaih nuiah a nih hi…Kan buai lo I la ti talh dawn em ni? Thatchhiatna ruamah kan lut a, thalai hnathawk peih lo,inti changkang tawka lehkha zir, hna thawh duh bik nei,buaipui ngai kan ngah zia te hi, ruihhlo ngai kan pung telh telh a, zu in thiam kan nghak chhung hian khawvel chhuahsan mi engzat tak awm ang i maw?!! Nu leh pa ten an fate enkawl ngaihna an hriatloh, midang enkawlna hmuna an dah zozai te hi..Zirna,hnathawhna ah hnamdangin min chimral zel dawn a sin. Pathian thu-ah lah mahni ngaihdana lo kal filawr kan awm nual bawk si. Belhchian kan va han dawl lo tak em!! I tang deuh teh ang u, I tangrual ehe ang u. I inzir deuh teh ang u. Heng zawng zawng insiamthatna bul ber chu chhungkua hi a ni tlat si. Chhungkua kan inenkawl dan hi Pathian duhzawng angin nge kan kal,keimahni duhzawng angin le? Engtin tak chuan awm zel ang i maw…?