State Election Commission chuan Village leh Local Council inthlan chu August ni 27, 2020 a neih turin a puang tawh a, ram pumah inpuahchahna a kal mek a ni. Hetih lai hian Covid 19 a len vangin vote thlak tura mipui punkhawm chu a him lo nia hriain BJP Mizoram chuan a hun sawn turin SEC hnenah ngenna a lo thlen tawh a. MPCC pawhin tunhnai khan inthlan hi a theihnaah chuan sawn hlat ni mai se tiin SEC hnenah hian a thlen tawh bawk a ni. Hetih lai hian SEC lam chuan inthlan tihdanglam tumna engmah a sawi lo a ni.

Tunhnaiah positive contact atangin hri hi inkaidarh a ni nual tawh a, nitinin a vei thar kan neih belh mek bawk a ni. Mitin rilruah eng ang chiahin nge a darh tawh ang? tihte, vantlangah hripui hi a darh tawh ang em? tih te a awm lian tawh hle a. Tunah hian hri kai hi 900 bawr an ni tawh a, a vei mek hi 500 dawn an ni bawk a, mithiamte chuan pun zel an ring bawk a ni. Health department sawi danin hripui vei enkawlna khum hi 700 chuang a awma, dam tawh chhuah tir (discharge) leh a la vei zat a inbuk tawk loh phei chuan inenkawlna hmun buaipui a ngai zel dawn a ni. A hna hi a hautakin tun ang renga kan kal a nih phei chuan health worker te an indaih seng dawn loa, hripui leng thunun theih loh chin kan thleng palh ang tih a hlauhawm tan ti tih e.

Hetiang hi kan dinhmun a ni mek a. Mi tam tak rilruah chuan inthlan hi sawn hlat leh mai duhna a lian khawpin a lang bawk a ni. Inthlan hi kal tlangpui niin mipui vote thlak tur pungkhawm hi fimkhur hle mah se, palh thil thuah kan hlauh tak mai hi vantlangah nasa zawka a darh a nih chuan inthlan thuneitu SEC leh sawrkar lam chu nasa takin dem an hlawh thei dawn a. Hetih rual hian inthlan hi sawn hlat ni ta sela hripuiin min chiah tak tak hun nen a innang a nih chuan inthlan buai tak kan nei dawn tho tho tihna a ni a, dinhmun a khirh a ni.

Inthlanah chuan khua leh tui tha ni turin vote thlak hi mitin mawh a ni thin a, tun tum inthlanah chuan hetiang ang zawnga infuih pawh hi uar taka sawi ngam a ni em? tih chu zawhna chhan har tak a ni. Eng pawh nise vote thlaktute leh a buaipuitute’n fimkhur leh inveng chungin he hun pawimawh tak hi an hmachhawn erawh a ngai khawp ang.