New Economic Development Policy hnuaia Entrepreneurship Development Scheme (EDS) chu kalpui zel a nih tur thu tualchhung chanchinbu Vanglaini chuan a tarlang a. NEDP hi sawrkar hmasa Congress-in a kalpui kha a ni a, MNF sawrkarin a rawn chhunzawm dawn niin a lang.   Democracy ramah chuan inthlan hmanga sawrkarna siam thin a ni ngai a, party te’n an inchuh thin avangin an inhaw deuh thaw emaw tih tur a ni fo thin a ni. Sawrkar hmasa hmalakna zingah chhunzawm tlakte awm thin mah se an hmalakna a nih loh avangin tihtawp a ni fo tawh thin a. Hei hi mipui leh ramin a tuar fo thin a ni. Congress leh MNF party te hi inhal tak mai an ni a, MNF sawrkar tharin hetianga sawrkar hmasa zawk Congress hmalaknaah pawh policy lian tak mai a rawn chhunzawm hi thil lawmawm a ni a, chhinchhiah tlak tak pawh a ni bawk a ni.   India ram state zingah pawh pachhe tak mai kan ni a, thawhchhuah mumal kan neih lohzia kan hretlang vek a. Hetiang a nih avang hian hna pawhin min daih seng lo fo thin a ni. Entrepreneur-te hi mi tam tak tana eizawnna siamtu an ni, sawrkar hnain ram hausa zawkah pawh a daih seng bik lo a, entrepreneur te chu hna petu an ni fo thin a, sawrkar chhawktu pawh an ni thin a ni. Khawpui lian zawkah phei chuan lehkhathiam hna hmu lo hi a awm tak tak theih tawh lo a, thiamthil (skill) an neih chuan entrepreneur lian tak tak te’n hlawh tha zawkin an chhawr zel zawk tawh a ni.   Entrepreneur-te hi ram tichangkangtu zinga hmanraw pawimawh tak an ni a, an siam chhuah hmangin ramin ei leh barah hma a sawn thin a ni. Ram tana an thawhhlawk avang hian an dinhmun a pawimawh hle a, an hmakhua tur pawh hi Sawrkarin ngaihtuahsaka, an dinhmun sawhngheh kawngah pawh theihtawp a chhuahpui a tul takzet a ni.   MNF sawrkar tharin entrepreneur-te dinhmun dah sanga entrepreneur tharte dinhmun sang zawka hlankai a tumna hi a tha hle a. Ram tan a that zawk dawn avanga an hmalakna ni miah lo chhunzawm an hreh lo ngam hi fak tur a ni bawk ang.