ZALEN Feb 16, 2026: Vawiin khan Gauhati High Court, Aizawl Bench Conference Hall-ah One Day Seminar on “Various Provisions and Environmental Laws and the Harmful Impacts of Pollution and Environment Degradation” chungchang Seminar neih a ni.

Chawhma lamah Inaugural Session neih a ni a. Hon’ble Mr. Justice Nelson Sailo, Judge, Gauhati High Court and Executive Chairman, Mizoram State Legal Services Authority chuan programme hman anih chhante sawiin kalkhawm lo lawmna hun a hmang a. Justice Nelson chuan tualchhung leh khawvel pum huapa boruak harsatna lian zel chu sawiin, boruak humhalh chu dan anga tih tur mai ni lovin, mi zawng zawngin mawhphurhna an nei a ni tih a sawi. 

Hon’ble Mr. Justice Michael Zothankhuma, Judge, Gauhati High Court and Executive Chairman, Assam State Legal Services Authority chuan environment humhalhna chungchanga dan siam tharte sawiin, environment thianghlim leh hrisel nei tura a humhalhna kawngah judiciary-in hma a lak dan a sawi a. Hmasawnna tha leh tlo nei tur chuan mi tupawh mai hian environment humhalh kawngah tan lak a ngaih thu a sawi.

Hon’ble Mr. Justice Ashutosh Kumar, Chief Justice, Gauhati High Court and Patron-in-Chief, Mizoram State Legal Services Authority chuan dan rorelna leh boruak enkawlna inzawmna chungchang a sawi a. Justice Ashutosh Kumar chuan boruak chhiatna hian mipui hriselna, sum leh pai dinhmun leh khawtlang nun a nghawng dan te, Environment dan siam tha taka kalpui a nih theih nan thuneitute, institution leh mipuite inkara thawhhona tha tak neih a ngaih thu sawiin mipuite chu environment humhalh kawngah tan la turin a fuih.

Inaugural Session hi Dr. HTC Lalrinchhana, Registrar, Gauhati High Court, Aizawl Bench chuan Hon’ble Judge-te’n thuchah pawimawh tak tak an sawi avangin lawmthu a sawi a, a tel zawng zawng te leh a buatsaihtu zawng zawngte chungah lawmthu a sawi bawk. 

Inaugural Session neih zawh hnuah Technical Session vawi 3(thum) neih chhunzawm leh nghal a ni a, he hunah Dr. Shantanu Dutta, Regional Director, Central Pollution Control Board leh Dr. Lalramnghaki Pachuau, Scientist, Mizoram Pollution Control Board te chu Resource person an ni a. He hunah hian Pu Rajeev Kumar Tiwari, IFS, PCCF leh Environment, Forest and Climate Change Department Officer thahnem tak te, Mizoram Pollution Control Board Officer te, Mizoram Judicial Officers te, DGP leh Police Officer dang te, MJA Member te, NGO hrang hrang leh Kohhran hrang hrang aiawh leh mi pawimawh dang engemaw zat an tel.

Valedictory Session-ah Hon’ble Mrs. Justice Marli Vankung, Judge, Gauhati High Court and Chairperson, High Court Legal Services Committee, Gauhati High Court, Aizawl Bench chuan environment humhalh pawimawhzia te, seminar hian rah duhawm tak chhuah se a duh thute a sawi a, environment humhalh tur hian mi tupawhin mawhphurhna kan neih thu a sawi bawk.

#ZalenNews