ZALEN December 20, 2025: Chawnpui Veng chuan Environment chhe zel tur venna kawnga an hmalakna an chhunzawm a, Vawiin zing dar 8:00 - 10:00 inkar chhung khan Plastic Bottle chhia leh Sarang chhia KG-ah Rs.30/- in an leikhawm leh a, Kg 200 an leikhawm a ni.

Chawnpui Veng hian faina kawngah chuan inzirtirna an nei thin a, YMA information center atanga auvin, chhungtin te atangin a ruala khawlai phiahfai hun te an nei tawh a, a hlawk thlak hle in an hria. Tin, naupang zawkte khawlaia bawlhhlawh chhar fai te an inzirtir pawh hian thangtharte rilruah a tha lam zawnga nghawng a neih chhoh an beisei. Environment humhalhna kawnga an hmalakna hi beitham viau mah sela, tlem tal chuan awmzia a neih ve ngei an beisei. Vawiin a Plastic Bottle chhia leh Sarang chhia an leikhawm hi tum hnih (2nd time) na a ni tawh a, zawngchhang thlak an ti a, lei chhunzawm zel an tum a ni.

Chawnpui Br. YMA chuan Plastic Bottle chhia leh Sarang chhia khawlaia paih mai mai thin hian nasa takin lui tui a ti bawlhhlawh a, lui nungcha tan a pawi em em bawk a ni. Tin, Leimin nasa tak a siam thei a, hei hian chhiatna namen lo a thlen thei a ni. Chuvangin, Chawnpui Br. YMA hnuaiah “Faina Beihpui Komiti” din a ni a, hemi kaltlang hian Vengchhung mi in phalte atangin sum tam tak an dawng a, Plastic Bottle chhia leh Sarang chhia an lei theih phah a ni.

Ni 20.12.2025 (Inrinni) a Chawnpui Kawna Plastic Bottle ruak leh Sarang hluihlawn tawh leikhawmna hun hi Chawnpui Br. YMA Faina Beihpui Komiti President Lalrammawia, Branch YMA President Tv. Lalhmangaiha bakah Local Council Chairman H.Lalrinkimi te pawhin an tel pui a ni.