Aizawl; Insak nana hman thin iron rod siamtu Mizorama awmchhun EPIP a inbun ISPAT chuan kawngchhiat vanga harsatna an tawh thu nimin khan a hmuna kal chanchinbumite an hrilh a, EPIP kawng siamnan hian pawisa pawh an seng nual tawh niin an CEO chuan a sawi. Industry hmun atana sawrkarin a duan EPIP kawng chu motor te in a tlan hleih theih loh a, Sub-Urban Vehicle (SUV) lo chuan a kal theih loh tluk a ni. “Kum 2014-ah kan indin tana kawng hi company pawi-sa sengin vawi 2 kan siam tawh a, a vaiin nuai 20 lai kan seng tawh a ni,“ tiin ISPAT CEO Roshan Agarwal chuan Zalen a hrilh a ni. Zawhna chhangin,” PWD leh Industries Department hnenah vawi tam tak siam turin ngenna kan thehlut tawh a, mahse vawiin thlengin siam a la ni lo,” CEO chuan a ti bawk. ISPAT enkawltute chuan an rod siam chu Mizoram vekah hralh a nih thu sawiin, “ ISPAT hian ISI leh ISO a nei a, Bagha, Kolkata leh Guwahati vela iron rod lo lut aiin a tha zawk a, a man a tlawm zawk a. Kawng hi tha sela chu hei aia tam hi kan siam anga, a man pawh a tlawm thei zawk ang. Sawrkar hian EPIP kawng hi chu siam tha sela kan duh khawp mai,” tiin ISPAT enkawltu Jospeh Samuel chuan Zalen a hrilh. Khawtlang a puih ngaite chu theih tawpa an puih thin thu CEO chuan sawiin “ Kan puih theih te chu kut ruaka haw tir kan hreh a, mirethei hnenah te, khawtlang tan te leh tournament atan sum kan seng nual tawh a ni,” a ti bawk. ISPAT hian hnathawk 150 a neih zinga 50% chu Mizo an ni a. “Mizo te hi taima takin inzir thei sela tuna an hna chelh aia sang hi an chelh thei tur a ni. Hnam dang rawih chuan quarter leh ei tur a hrana buaipui leh a ngai a, Mizo hna thiam ti tha peih an awm chuan kan duh zawk a ni,” tiin Project Coordinator Joseph Samuel chuan Zalen a hrilh a ni. Tuna Mizo thawkte te chuan electric hna, bank duty, security, sawrkar department duty, ei tur leia bazar leh labour hna an thawk tlangpui a ni.