League-a pahnihna Arsenal chuan zanin dar 9 hian Emirates Stadium-ah Liverpool an mikhual dawn a, City lak atangin Premier League hmahruaitu nihna chhuhsak leh an tum dawn a ni.

Hetihlai hian mikhual team hian league match hnuhnung pahnihah an inhnehtawk tawh avangin chakna kawnga kir leh an tum ruh hle thung ang.

Beiseina sang tak nen nipui transfer-ah champion lai Manchester City aṭanga Gabriel Jesus leh Oleksandr Zinchenko an lei a, Gunners fan tam tak te beisei aia thain season bul an tan chho a, season hmasa lama an rilru na pawh a dam cho tan mek niin a hriat.

Kar tawp khan North London derby-ah an hmelma hlun, Tottenham Hotspur chu Jesus, Thomas Partey leh Granit Xhaka te goal thun hmangin 3-1 a hnehin coach Mikel Arteta-a hovin Premier League hmahruaitu dinhmun an humhim a nih kha.

Liverpool hian tun hnaiah Pep Guardiola-a team Man City khing tawk ber an ni thin a, amaherawhchu tun season-ah hian bul an tan tha lo hle a, tunah point 10 hmuin table-ah 9-na an ni phak hram. Zanina an hmachhawn tur Arsenal aiin point 11 zetin an hniam a, mahse season liam taa Premier League pahnihna Liverpool kha an la nireng tih erawh theihnghilh chi a ni lovang.

Ninani zan Europa League-ah an khingpui Bodo/Glimt 3-0 a sawptu Gunners hi an home match 8-ah an la chak vek a, zanin hian a zawna vawi 9 chak theihna huntha hi bawh pelh an duhin a rinawm loh. Arsenal hian Reds hi an hneh loh a nih chu hmahruaitu an ni chhunzawm thei kherin a rinawm loh.

Tun hnaia season bul an tan chhiat ber tum tawng mek Liverpool pawh hian point hloh belh zel an tumin a rinawm loh a, game khatin khel tlem zawk mahse an hmachhawn tur Arsenal ai hian point 11 zetin an hniam zawk a, season tir lam mah nise an kar inhlat tak hi siam that a har ve tawh fu mai thei. 

An game hmasa pathum aṭanga point hnih chiah an lak hnuah Merseysider hian an home-ah Bournemouth leh Newcastle United lakah a zawnin hnehna an chang a, an kaltluang dawn viau emaw tih laiin hemi hnu hian Everton leh Brighton & Hove Albion-te'n an chelh leh thung.

Reds hian an mizia ropui lantirin huaisen takin kar tawp khan Anfield-ah Seagulls lakah si hnih an phurh hnuah rul leh vekin 3-2 in an chak thei. Klopp hian Thawhlehni khan Champions League-ah Rangers lakah attacking formation thlak danglam hlekin midfield-ah Thiago Alcantara leh club captain Jordan Henderson a hmang a, tlar hmaah player pali a tlar a, Trent Alexander-Arnold-a freekick leh Mohamed Salah-a penalty hmangin a tawpah 2-0 in season hmasa Europa League-a pahnihna hi an chak.

German hian huaisen takin Emirates Stadium-ah a naute a luhpui ngam dawn dawn em tih chu a hriat loh naa tun hnaia form tha tak Arsenal team tan pawh huphurhawm tak chu an ni ve ngei ang. Arteta hian kar laihawla a Bodo/Glimt an hneh ṭumin vawi riat ngawt a thlak danglam ve bawk.
    Ukraine full-back hi Premier League-a a khelh hnuhnun ber ṭum khan Spurs lakah mak tak maiin starter a ni a, Pathianni khan left-back-ah Kieran Tierney thlak thei tur khawpin a fit tura ngaih a ni. 

Martinelli, Xhaka leh Gabriel te hi starting XI-a an dinhmun humhim thei player pathum an ni a, an pathum hian Liverpool lakah inkhelh bul an ṭan leh ngeiin a rinawm. Club captain Martin Odegaard chu attacking midfield-ah a awmin a rinawm bawk. Emile Smith Rowe leh Mohamed Elneny te erawh hliam vangin an chhawr theih hmel loh. 

Liverpool lam pawh hliamin a la kalsan hleithei lo va, midfielder Naby Keita, Alex Oxlade-Chamberlain, Arthur leh Curtis Jones te tel lo va an zin chhuah a ngai ang.

German hian buaina pakhat a neiin a rinawm a, a hman than 4-3-3 formation pangngaiah a kir leh dawn nge, thawhlehni zana Rangers an hneh tuma a formation hman 4-2-3-1 system kha a hman chhunzawm dawn tih a ni. Arsenal hi team tha leh hmatawng nei tha an nih vangin a formation hman rim zawk hi a hmang maiin a rinawm. 

Arsenal tana starting lineup chang tura rinte:
Ramsdale; White, Saliba, Gabriel, Zinchenko; Partey, Xhaka; Saka, Odegaard, Martinelli; Jesus

Liverpool tana starting lineup chang tura rinte:
Alisson; Alexander-Arnold, Matip, Van Dijk, Tsimikas; Henderson, Fabinho, Thiago; Salah, Jota, Diaz