Football-ah hian manager-te hi an pawimawh em em a, an pawimawhna leh tangkaina hmuthiam lo pawh mi tam tak chu kan awm tho awm e.. Manager hna hi, inkhelh laia mual sira lo din a, tang taka mahni pawlte lo fuih satliah hi a ni ngawt lo va, training-na hmunah thil tam tak an naute an zirtir thin a, inkhelh laklawh laiin an nau ten an team hmachhawnte an hneh theih dan tur ngaihtuahin game an thlak danglam a, awmze nei takin substitution te pawh an siam thin. Tun season chhunga English Premier League manager tha bik thlan chhuah panga te chu Thomas Frank, Pep Guardiola, Eddie Howe, Jurgen Klopp leh Patrick Vieira te niin an zing atang hian a tha ber an thlang leh ang. 

EPL manager of the Season nominee:  

Thomas Frank (BRE)
    Frank-a tan tun season hi Premier League lama a tel ve tum khatna chauh a ni. A team enkawl Brentford hi team thaa sawi tur an ni hauh lo, player langsar pawh an nei hek lo. Mahse, a naute chu khelh dan style mawi leh danglam tak a zirtir a, table-ah 13-na a nih pui thei. Tun season chhungin an ngam loh ngei tura ngaih team lian Chelsea, West Ham United leh Arsenal te an hneh thei a ni.
Pep Guardiola (MCI)
    Sawi tam ngai lovin Spaniard Pep Guardiola hi chu kan hre fur awm e. Season nga chhung Manchester City a enkawl chhungin Premier League trophy vawi thum a chawi pui tawh a, a pali-na tur an nghak leh mek bawk. Tunah hian match hnih khelh tur an la nei a, an chak ve ve a nih chuan an champion thei dawn. A team enkawl mek City lamin an beisei leh duh ber Champions League trophy a chawipui mai theih loh vang erawh chuan a ropui tur angin a ropui hlei thei lo.
Eddie Howe (NEW)
    Kum tir lamah an chechhe em em a, , match 14 zet chak nei lova an awm tawh hnua ropui taka Newcastle United rawn vawr chhuak lehtu a ni. An thil tawn ang hi Premier League history-ah club dang an la awm ngai lo. Howe-a'n Newcastle a enkawl tirh November thla khan point nga chiah an la hmu a, tunah chuan point 43 neiin table-ah 14-na dinhmun an hauh mek. Team thaa sawi ni lem lo Newcastle hi match kua lai chu chak loh nei lovin a kaihruai nghe nghe.  
Jurgen Klopp (LIV)
    Klopp-a enkawl Liverpool hian tunah Reds tana  Premier League title vawi hnihna tur a beisei mek a, an chung chiaha awm City-te khelh danah an innghat thung. Liverpool hian goal an thun theih rualin an lamah goal a lut tlem hle a, hei tak hi Klopp-a ropuina langsar lai a ni. Tun Season-a tlawm nei tlem ber an ni bawk.
 Patrick Vieira (CRY)
    Premier League manager anga a season khatnaah  Crystal Palace manager Vieira hian a team te chu table chanve chung lamah a awmpui thei. Selhurst Park lama an fans te mak tih khawpin player lak a thiam a, a philosophy tha hmang tangkaiin nipui laia a player lak luhte chu team dinhmun siam thatu langsar  te an ni.