EPL chuan player of the season nominee a puang a, Trent Alexander-Arnold, Cancelo, De Bruyne, Salah, Son, Saka, Bowen leh Ward-Prowse te an lang. An player thlan chhuah te hi an team tan eng ang chiahin nge an pawimawh tawi tein i han thlir dawn chhin teh ang.
EPL Player of the Season nominee: 

Trent Alexander-Arnold (LIV)
    Liverpool right-back hian a team tan a thawh hlawk hle a, a khelhna hi langsar vut lo mah se a pawimawhna an hmuh hmaih lo. Liverpool-in goal an dan theihna kawnga tha thawh nasa ber pawl niin club tana player pawimawh a ni. Tun season-ah goal hnih thunin midang tan goal 12 a siam sak bawk. 
Jarrod Bowen (WHU)
    West Ham United winger Bowen hi Premier League season-a goal thun leh assist kawnga double figure nei thei pahnihna a ni. Paolo Di Canio kha a hmasa ber niin a ni khan goal 10 a thun bakah assist 10 a nei bawk. Anni pahnih ang hi player dang an la awm ngai lo. 
Joao Cancelo (MCI)
    Manchester City hian trophy an chawi a nih chuan, an hlawhtlinna atana player pawimawh hriat hmaih miah loh tur chu pa inthazo leh tuan tha an full-back Cancelo hi a ni ngei ang. An player zinga mual chhunga hun hmang tam ber pakhat a ni a, mahni pawlte pass pe tam ber zingah a tel bawk. Tun season-ah goal leh assist 8 a nei tawh. 
Kevin De Bruyne (MCI)
    EA SPORTS Player of the Season award tum khat aia tam dawng thei player pali zinga pakhat Kevin De Bruyne hi 2019/20 season khan player of the season-ah thlan a ni tawh a, a ni lo hetiang dinhmun ding thei player pathum dangte chu Nemanja Vidic, Cristiano Ronaldo leh Thierry Henry te an ni. A chanchin sawi tam ngai lovin tunge a nih kan hre vek. Tun season-ah goal leh assist 15 a nei tawh bawk.  
Bukayo Saka (ARS)
    Kum 2015/2016 hnua a vawi khat nan Arsenal chuan top-four an beisei mek a, hetiang dinhmun an thlen theihna tur hian kum 20 mi Saka hian a thawhhlawk em em a ni. Tun season-ah goal 11 thun tawhin assist tum 6 a nei tawh bawk. UEFA European Championship final a penalty-shootout-a an chak loh tum khan hun harsa leh hrehawm tak karah mizia ropui tak a nei tih a tilang bawk.  
Mohamed Salah (LIV)
    2017/18 season EA SPORTS Player of the Season hi nikum lam pawh khan thlan a ni teuh hle a, Golden Boot dawng thei tur zinga goal thun tam ber Salah hian goal 22 nei mek. Premier League season hrang hrang pali a goal 20+ thun thei player 6 zinga pakhat a ni. 
Son Heung-min (TOT)
    Son hian Premier League season khat chhunga goal a thun tam ber tum tawngin goal 21 a thun tawh. Tuna goal thun tam ber Salah aiin goal khat chiahin a hniam rih a, Golden Boot dawng thut thei din hmunah a ding mek. A goal thun te reng reng hi penalty area chhung atangin a ni ngai meuh lo bawk.
James Ward-Prowse (SOU)
    Southampton captain hi midfield-a chuan team khat tana player thawh hlawk ber ani hial awm e. Free-kick a chhuih thiam hi a larna ni bawkin tun season-a a goal 9 thun zinga goal 4 hi direct free-kick atanga a thun an ni.