DOWNLOAD OUR APP

Read latest news on your phone
app-store

ERC report zingah 32 hlawhtling tawh

May 02, 2015

ERC report zingah 32 hlawhtling tawh

Aizawl: School Education Department chuan Education Reforms Commission report zinga 32 chu a ti hlawhtling tawh a, report bawhzuina chikhat atan Primary zirtirtu 362 leh Middle zirtirtu 136 Voluntary Retirement Scheme hmanga hna atanga chawlhtir hmun ruak hnawhkhat tur in thalai lehkhathiam zawk 396 pek an ni tawh bawk. School Education Department thawktute hnen atanga thudawn danin Education Reforms Commission (ERC) rawtna te hi tih hlawhtlin nghal mai theih te,tlema nghah deuh ngai leh a then chu hun rei deuh hlek duh te an nih vangin thawklehkhata tih hlawhtlin vek theih a ni lo tih an sawi a. A then chu sum sen tulna teanih avangin Mizoram sawrkar tan tih hlawhtlin mai theih a ni lo a, project siamin central ah thehluh a ni a, hei hi a hlawhtlin chuan chak zawka hmalak theih a beiseiawm tih an sawi bawk. ERC report tih hlawhtlin tawh zingah hian Class VIII Middle school a beh tir te, Early childhood care & education (Pre School) siam thar te, Lunglei leh Champhaia Kendriya Vidyalaya School din te, Chhingchhip-a Sainik school leh Lungsen a Model school din te, kum 2011 atanga CCE (continuous and comprehensive evaluation) kalpui te, Class X thleng Hindi compulsory subject a dah, zirtirtute tan staff quarter sak, ziak leh chhiar thiam tlemna district 3- Lawngtlai, Lunglei leh Mamit ah te hmalak, Adult Education lam uar, School Aacdemic Session April to March atana sawn, zirtirtute DIET a training tir te chu a langsar zualte an ni. Hetih lai hian Education Reforms Commission in Middle School a awm thin Class V chu Primary school ah sawn nise tia rawtna a siam chu Class room sak belh a ngaih dawn vang leh sum awm loh vangin tih hlawhtlin theih a ni hrih lo a. Zirtirtu indaihlohna ti ziaawm tur leh naupang tlem lutuk sawikhawm nan school te inchhunfin tura ruahmanna awm pawh mipui lam atanga dodalna a awm vangin tih hlawhtlin a harsa rih nia thudawn a ni bawk.
Share now