Tun season zawh ruala Old Trafford lama inpu lut tawh tur, Manchester United manager thar Erik ten Hag chuan Benfica striker Uruguayan Darwin Nunez chu lak luh ngei a tum a, a nghakhlel tawh hle niin an sawi. 

Premier League club lian United hian kum 22 mi striker hi tun nipui chhung hian lakluh ngei an tum dawn a, a agent Jorge Mendes nen pawh inbikna an kalpui tep tawh a ni. 
Benfica lam hian an player duhlai Nunez manah hian €130 million an chhiar a, an chhiar zat anga an hralh thei a nih chuan an club-record siam a Atletico Madrid lama Joao Felix-a kum 2019-a €127 million zeta an hralhna kha a khum thei dawn a ni.

Manchester United coach, Dutch tactician Ten Hag chuan Nunez hi a duh hle a, Premier League lama khel turin a insiam rem theih thuai a beisei thu a sawi.

Kum 2020 khan Nunez hian Spanish club Almeria atangin Benfica hi a zawm a, Portuguese club tana a season hmasa berah competition hrang hrangah game 44 khelin goal 14 a thun thei a, Uruguayan hian season tharah chuan tun aia hma a sawn ngei rin a ni bawk. 

Nelson Verissimo tana a khelh laiin game 39-ah goal 33 zet a thun a, a mimal chet that vangin a club chuan Champions League quarter-final an thlen theih phah. 

Liverpool lam pawhin Mohammed Salah a dinhmun a zirin Nunez hi lak luh dan kawng an zawng ang. Egyptian Salah hian an club hi a chhuah san thut thei reng a, a chhan chu Salah hian a contract hi pawhsei a duh rih mai loh chuan nakum lamah free transfer-a a chhuah a ngai dawn tho. Chuvangin, kumin hian a aiawh tutur Reds hian an zawn a ngai dawn a ni.