DOWNLOAD OUR APP

Read latest news on your phone
play-store app-store
app-store
ad
Estheri bua thuruk inphum tlat chu
titi ZALEN
Mar 14, 2020
  • R.Zomawia, ITI
  • Kum 2020-ah hian Mizoram Presbyterian kohhran chuan Puitling Sande Sikul lamah chuan Estheri leh Thuhriltu zir chhoh mek a ni. Estheri hi a ziak ngau ngau han en chuan a thawnthu-na lai tam tak hmuh tur a awm a, ziak mi thiam takin thawnthu duhthusama a chheh chhoh anna laite pawh a awm a, Estheri bu-ah hian Pathian hming a lang miah lo va (tuna Bible-a hman laiah hi chuan Estheri Bu-ah hian Pathian hming a lang lo, Greek version lamah chuan a lo lang pawh a ni mahna le). Hei hian ngaihtuahna ril tak min siamtir bawk. Chik taka han zir erawh chuan awmze nei vek a lo ni zel a, hetiang hian inzawt ta ila? Pathian hian kan nunah hna a thawkin kan hria em? Kan nunah hian hna a thawk ngei nia hriat hun zawng a awm thin a nih hi. Mihring leh mihring inkara inlaichinna chhe tawh thuam that leh a nih chang emaw, kan han inngainat thar leh theih changte hian Pathian a che tih chu hriat a har lo. Eng emaw chang chuan khawhar leh mal riauva inhriat avanga lungngaih hun erawh chu kan nei thin. Tawngtaia kan dilnate pawh hi bengkhawn a hlawh lo ni maia hriat chang pawh kan nei thin ang. Rin tlak Pathian a nihna hi eng emaw chang changa lo lang chauh tur a ni em? Nge, sana hunbi hriltu pendulum then reng ang hian, engtik lai pawhin a khawngaihna thiltih hi a lang chhunzawm pat reng zawk? He hringnuna nun chhang tur hian Estheri bu hian min hrilhfiah hle a ni. I lo en teh ang.
  • SAM 121:4-ah chuan, “Ngai teh, Israel-ho vengtu chu a muthlu lo vang a, a muhil hek lo vang,” tih kan hmu a. Hmuh theih loh kut hmangin Pathian chuan mi a hruai tlat thin si a ni. Mita hmuh theih khawpa chiang kan phut kher thin avang hian Pathian min awmpuina hi kan ngaihthah ta thin a ni. A beisei loh lam taka Pathian rinawmna tawngtu hmeichhe pakhat chanchin chu Thuthlung Hlui chuan min hrilh a. Chu hmeichhe rinawm tak leh hmeltha tak chu Estheri a ni. A hmelthatna leh mawina, a thuawihna chuan lalnu dinhmunah a thuttir a, a hnam boral vek tur chu a chhanchhuah theih phah ta a ni.
  • Estheri bua Pathian hming a lan hauh loh avang hian Estheri bua a changtu ber pahnih, Estheri leh Mordekaia chunga Pathian hna thawh chungchang thu hian kum za eng emaw zat chhung chu mi rilru a lo tibuai tawh a. Estheri bu hi zawng a ziaktu hming chuang lo lem ziah ang mai hi a ni a; a ziaktu hming chu chuang lo mah se, chu thil chu eng lem nge tih a hriat theih si a ni. A bu chhungah hian lang lo lama mi ‘Awma’ chu ‘Tunge’ tih hi thil zawn chhuah har tur chu a ni hauh lo vang le. Chuvangin, a bu hi uluk taka zir hi kan bat a ni tlat. Pathian hi a awm a ni tih sawi fiah chiam ngai lovin, ama hna thawhah hian amah chu ‘AWMA’ a ni tih hi a lang chiang nawn awn awn thin a. Estheri bua Pathian hming lang miah lo hian, lang lo lam atanga vengtu Pathian a nihna hi a pho lang zawk a lo ni. Ziaka hming nem nghehna tar chhuah kher hi Pathian hian a mamawh ber lo. Sam 97:6-ah chuan, “Vante khian a dikzia a puang chhuak thin a,” tih kan hmu a; Mihring fate hian a hna thawh hi an puang chhuak thin a ni. ‘Awma’ a nihzia chu Israel-te chunga a rinawmzia puan chhuaha a lo awm hian a chiang leh mai thin (Sam 98:2, 3).
  • Chutiang bawk chu tuna Krista ringtu kan nihna pawh hi a ni a; a hring a hrana amah hmu lo chung pawhin kan “ring” a nih hi. Petera chuan tim map lovin, “Amah hmu ngai lo pawhin amah chu in hmangaih a. Tunah hian amah chu hmu rih lo mah ula, amah chu in ring a; sawi hleih theih loh khawpa lawmna leh ropuinain in khat a,” a ti hmiah mai?(I Petera 1:8). Chuvang chuan, “Hmuh theih vanga kal ni lovin, rinnaa kal kan ni zawk si a” (2 Korinth 5:7). Estheri bu hi Bible-a lehkhabu pakhat, Thlarau Thianghlim hruaina atanga hringnuna thil thleng kan hmuh fiah theihna, kan ngaih pawimawh ngei ngei tur lehkhabu chu a lo ni. Kan ni tin nuna Pathian hna thawh lo lang thin kan hmuh theih a hmanrua chu Estheri bu-ah hian a awm.
  • Lang lo lam atanga Pathianin Israel hnam a ngaihsakna thuin a bu hi a luan chhuak a; Pathianin a humhalh dan leh a awp dan pawh tar lan a ni bawk (Sam 33:13-22; Isaia 45:7; Tirhkohte 17:24-28). Jentail-te huna Israel-te hnawl an nih dan a sawi uar hle a; chuti chunga Israel hnam tana Pathian thil ruahmanna kal zel dan chu Estheri buah hian a chuang a ni. Lang lo lam atanga Pathian inrawlhna chu Estheri bu laimu tak chu a ni.

Latest News & Chhiar Hlawh