2009 hnua a vawi khat nan England chuan hmeichhe tournment lian final an lut. Euro 2022 khelh mekah England nu ho chuan Olympic finalist Sweden si li faiin an hneh. 

Tun hnaiah Lionesses te hi an kal tluang hle a, manager Sarina Wiegman hnuaiah chak loh nei lovin game 19 zet an kal tluang tawh a ni. July ni 31 khian Wembly stadium-ah semi-final lehlama intum Germany leh France chak zawk zawk nen final an khel ang. 

Bramall Lane-a semi-final inkhel hmuhnawm takah hian minute 25 chhung vel bawr chu Sweden lam hi an chungnung zawk a, an nawr viau nachungin an finish tawih lo tak vangin goal erawh an thun thei lo. England lam pawh bet zawkah tang mah se an ball passing leh an khelh dan vel chu a class em em tho a, an bet rei lo bawk. 

Minute 34 an khel tihin Golden Boot dawng thei tura hmahruia mektu, Beth Mead chuan England tana an goal hmasa ber a thun a, minute 48-ah Bronze hmangin an goal hnihna an thun leh a, England lamin 2-0 in hma an hruai. Substitute atana rawn lut Alessia Russo chuan a theihna rawn pho langin a luh atanga minute 11-naah England tan goal a rawn khung ve leh bawk. Minute sawm bawr vel lek a ral tihin Kirby chuan an goal li-na a thun ve leh a, goal dang a luh belh lo.   

England keeper Mary Earps a khel tha a, goal ngei tura rin thahnem tak a save a, Arsenal striker Stina Blackstenius-i ball pet a lo dan sak phei chu mawi tak a ni. Blackstenius hian a ti goal teuh thei thin hle a, tum khat phei chu crossbar a pet per dawt a ni. 

He hnehna hian, Lionesses ten kum 13 zet major tournament final an luh ngai tawh lohna result duhawm lo tak chu a rawn chawk reh a, tunah chuan beiseina thar duhawm tak an nei leh mek tawh. Pathianni zan Wembley stadium-a an final khelh turah hian an champion a nih ngat phei chuan bung thar pawimawh tak an kai ngei dawn a ni.