Champions League semifinal-ah team pahnih an thawh hnuah Uefa Europa League-ah pawh Italy-in pahnih bawk an thawh leh ta.

Ningani zana quarterfinals inkhel thawh hnihnaah AS Roma chuan si an phurh zet hnuah extra time-ah goal hnih thunin Feyenoord an an hneh a, a thiam pali zingah an inhlang kai.

Jose Mourinho-a kaihhruai team hi inkhel hmasaah khan 1-0 in an lo tlawm tawh a, Rome khawpuia inkhelah erawh minute 120 chhungin 4-1 a hnehna changin vawi hnih khelhah 4-2 in an tlang.

Darkar khat zet an khelh hnuah Leonardo Spinazzola chuan goal hmahruai a thun a. Hun tawp dawnah Igor Paixao chuan mikhual tan sutin an tlang mai dawn emaw tih tawhah Pablo Dybala chuan minute 98-ah a chhanhim leh.

Extra time-ah Stephan El Shaarawy leh Lorenzo Pellegrini chuan Roma tan thun belhin 4-1 in hnehna an chang zui ta a ni.

Roma season hmasaa Europa Conference League final-ah pawh Feyenoord bawk hnehin Portuguese manager hovin nomawi an lo la tawh a ni.

Semifinal-ah Bayer Leverkusen an hmachhawn zui dawn a, German club hian Union Saint-Gilloise chu 4-1 a sawpin inkhel vawi hnihah 5-2 in an tlang ve thung.

Italian giants Juventus pawhin Sporting Lisbon hneh hramin a thiam pali zingah an inhlang kai a, Manchester United hnehtu, Sevilla an hmachhawn zui ang.

Turin khawpuia inkhelh hmasaka 1-0 a an chak tawh hnuah Portugal-ah Adrien Rabiot chuan minute 9-na lekah Juventus hi hma a hruaipui.

Tottenham forward hlui, Marcus Edwards chuan mual neitu tan sut mah se goal dang an thun belh lo va, inkhel vawi hnihah Juventus chu 2-1 in an chak ta a ni.