Ningani zana Federico Gatti-a’n hun tawp dawna an si phurh a sut hmangin Juventus chuan Seville an hnehtawk hram a, hetih lai hian AS Roma chuan Bayer Leverkusen chu si khat faia hnehin Europa League-ah final an hnaih ta hret.

Turin-ah Juve chak lo teuh
Europa League semi-final thawh khatnaah hian anmahni tantute hmaah Juve an chak lo teuh hle a, Turin khawpuia inkhelah hian si an phur hma hle a, an sut thei lawk lo thung.

Gatti hian substitute Paul Pogba thawhrah atangin minute 97-ah an si phurh a sut hram a. Hemi hma lawk hian Danilo chuan a tauh lut teuh hle bawk.

Seville hian Youssef En-Nesyri hmangin minute 26-ah hma an hruai a, Lucas Ocampos-a thawhrah a ni a. Mikhual mah ni se Spanish club hian inkhel an thunun zawk rei hle a, En-Nesyri leh Ocampos ten an thun belh teuh hle.

Juventus hian goal hlauhawm an nei thei mang lo va, hun tawp dawna Gatti-a tauh luh hi inkhelh puma goal zawna an pet vawi hnihna chauh a ni.

Sevilla hi ‘Europa League specialist’ tia an sawi fiamthu thin an ni a, quarterfinal-ah Manchester United an lo hneh tawh a, he intihsiaknaah hian vawi ruk champion tawhin champion ngun ber an ni a, nomawi an lak hnuhnung ber chu kum 2020 kha a ni.

Turin-ah hian mual neitute goal-ah vawi 13 zet pet an nei thei a, heng zinga vawi nga chu goal zawna kal a ni a, En-Nesyri vanneih zan ni sela chuan goal tam zawk nen an haw ngei a rinawm.

Rome-ah Roma chak
Italy thova inkhel dangah Edoardo Bove-a’n second-half-a a thun hmangin Jose Mourinho kaihhruai Roma chuan Leverkusen an hneh a, club pali zingah final lut turin an dinhmun a tha ber rih.

Kum 20 mi chauh hian Europe-a a goal hmasa ber a thun a, a hma lawkin Tammy Abraham-a’n a thun tep bawk.

Leverkusen tana hun tha ber chu tan atanga minute ruk leka Florian Wirtz-a pet niin goal zawn lo chiahah a kal a. Hun tawp dawnah Jeremie Frimpong chuan Rui Patricio tihsual zarah hun tha nei ve bawk mah se a hmang tangkai zo lo.

Team hnih hian penalty hlawh ngei tura inngaih hun an nei ve ve a; mahse, Premier League referee Michael Oliver chuan a pe lo ve ve.

Mourinho hian a team hi final a luhpui a nih chuan record duhawm tak a nei dawn a, Roma hi season hmasa khan Europa Conference League-ah a lo champion-pui tawh a, a hma zawnga Europe-a final a khelh tawh vawi ngaah Porto, Real Madrid, Manchester United leh Roma a lo champion-pui vek tawh bawk.

Ningani zana semifinal khelh hi Mourinho leh Real Madrid-a a kaihhruai thin, Xavi Alonso te manager ni chunga an intawnna hmasa ber a ni a. Portuguese manager kaihhruaina hnuaiah hian Spanish midfielder hian vawi 151 lai a lo khel tawh a ni.