India-a eptu lian ber hruaitu chuan Prime Minister Narendra Modi-a’n an ram hming, India tih atanga Bharat tia thlak a tum chu ‘awm ang lo lutuk’ tiin a sawi.

“Modi-a hian ram hming hi thlak a duh a, a awm ang lo tak zet a ni,” tiin ni nga thanga Europe-a zin mek, Rahul Gandhi chuan G20 Summit sawmnaa India aia Bharat tih hman chungchang an zawhna chu a chhang.

Modi-a sorkar hian an ram hming hi Sanskrit tawnga dahin ni hnih awh, New Delhi-a G20 Summit neih zawh taka telte zanriah ei tura a sawmna sem chhuahah a tar lang a, sawi zui a hlawh hle a. Inrinnia summit hawnnaah pawh khan Modi-a hian a hming tar lannaah ‘Bharat’ tiin a dah zui bawk.

Congress party hruaitu, Gandhi-a chuan sorkarin ram hming thlak a tum chu mi then a tumna hmanrua niin a sawi.

Brussels khawpuia Al Jazeera-in a kawmnaah, “Thil chiang tak chu,  Pu Gautam Adani-a leh mi hausa induhsakna chungchang kan sawi chhuah apiangin prime minister hi mipui rilru then darhna hmanrua nen a lo thawk chhuak ziah,” a ti.

Kum 53 mi, Congress party hruaitu chuan Modi-a chu industrialist hausate a duhsak nia sawiin, sum dik lo taka hmangtu nia hriat, Adani Group neitu, billionaire Adani-a chhui tura nawrna pawh a dodal tlat niin a sawi.

India-a lawngchawlhna leh thlawhna tumhmun tam tak thununtu, Adani Group hi tun hnaia chhuinaah sum hman dan fel tawk lo tam tak hai chhuah a ni.

Gandhi-a hi European Union-a dan siamtu, mihring dikna chanvo humnhalhtu leh Belgium, Netherlands, France leh Norway-a India mite kawm turin a zin.

Congress hruaitu hian July thlaa eptu party 30 dawnin thukhat vuaa nakum inthlanpuiah INDIA (Indian National Developmental, Inclusive Alliance) tiin an chuhho dawn tih a chian hnuah khan sorkar hi a ‘chiai’ niin a sawi.

“Eptu tangrualte hming hi a danglamin a tha khawp mai a, tute nge kan nih a tilang chiang hle a, India aw kan ni tih kan intilang a ni,” tiin Al Jazeera hi a hrilh.

Modi-a sawisel na thei tak, Gandhi-a hian khawthlang ram hruaituten Hindu nationalism chu ‘zalenna an pe’ niin a sawi a. Kum 2014-a Modi-a’n thuneihna a chan hnuah Hindu nationalist pawl hrang hrangten sakhaw zuitu tlem zawk, a bikin Muslim an bei nasa hle nia sawi thin a ni a, rorel lai, BJP erawh chuan a nih loh thu an sawi ve thung.

Muslim leh India-a hnam leh sakhaw zuitu tlem zawkten beih an tawk nasa tih hi tun hnaiah a lar hle a. United Nations leh mihring dikna chanvo humhalhtute pawhin New Delhi chet dan hi an dem a, BJP erawh chuan an sawiselna hi an pha zel thung.