Club ropui tak takte hlawhtlinna phenah hian manager tha tak an awm thin. Tun hnai kum 10 chhung ringawt pawh khan football khawvel-ah a dik zia hmuh tur a awm. Season liam taah pawh khan player mal that bik vang aiin an manager te thiam leh rem- hriatna vangin club tam zawk chuan league emaw Champions League an chawi theih phah ti ila kan sawi sual tam lovang. 

Tun tumah chuan Europe-a coach tanglai mek an club lama cham rei mi 4 te chanchin i han bih thuak dawn teh ang:

#4 Gian Piero Gasperini (June 2016- present)
    Gian Piero Gasperini hi Italian football manager duhawm ber zing ami a ni a, a attacking style hi Atalanta leh football fans te lawm zawng tak a ni bawk.

Kum 64 mi Gasperini-a’n Atalanta a enkawl hma hian Seria A lamah season 13 zet chu an lo khel tawh a, mahse beisei an phak ngai lo. Gasperini a rawn awm hnuah champion chiah lo mah se Serie A top-four tal an kai phak ta fo a, league table lamah 10 aia hniamah an awm ngai ta lo bawk. 

Europe lamah pawh an chetha chho ve zel a, 2020 khan Champions League quarter-final hial an khel phak.  An coach duh tak Gasperini hian nikum khan kum 2024 thleng cham chhunzawm turin contract a ziak thar. 

#3 Jurgen Klopp (October 2015- present)
 Jurgen Klopp hi tunlai European football manager duhawm ber pawl a ni mekin Liverpool tana thil ropui tih saktu a ni.

German coach hi 2015 October thla khan Borussia Dortmund atangin Anfield lamah hian a inbengbel tan a, hetih hunlai hian tun ang em hian Liverpool lamah a hlawhtlin ring phak an tam kher awm love. Mahse, transfer hmang tangkai thiam leh a tactic ropui vangin sang takah Liverpool a vawr ta a ni.
A zawm atanga kum nga-na 2020-ah a vawi khat nan a club chu Premier League a chawi pui a, 2019-ah Champions League an champion bawk.

Reds hian tun season Carabao Cup chu an chawi leh der tawh a, league lamah pahnihna niin FA Cup leh Champions League-ah te final an lut bawk. An vanneih hlauh phei chuan kumin hian trophy pali an chawi thei dawn a ni. Klopp hian Liverpool lamah 2026 thleng cham turin contract a ziak fel leh der tawh a ni. 

#2 Christian Streich (December 2011- present)
Kum 10 liam taa SC Freiburg-a zawm tirh kha chuan Christian Streich a that bikna hi an hmu thiam kher awm love, mahse tunah chuan club tan thil ropui tam tak a ti tawh a ni. 

Kum 1999-2009 inkar khan German club hi tum hnih zet an relegate a, top-flight-ah season ruk chauh an khel bawk. Streich a rawn lan hnu hian tum khat chu an relegate leh a, mah se season 10 chhung zet chu Bundesliga an khel leh tawh.

Bundesliga-ah hian club vantlang pawl tak an ni a, season li erawh an relegate leh lek lek thung. Tun season hi Streich-a hnuaia an hlawhtlin ber tum niin season tharah Champions League an khel phak mai thei.  
 

2020 khan a contract hi a pawtsei nia sawi thawm a awm a, mahse eng chen nge tih erawh puanzar a ni lo thung. Eng pawh nise, Streich hi hun eng emaw chen chu ala cham rih dawn niin a lang. 

#1 Diego Simeone (December 2011- present)
December 2011-a Spanish club a zawm hnu khan Diego Simeone hi Atletico Madrid hmel thar dintu pawimawh ber pakhat a ni chho. 

Argentinian Simeone-a rawn lan hma kha chuan league-a top-four a lan phak chu Atletico tan chuan lungawi thlak tak a ni. A rawn lan hnuah nasa taka club hmel hmang a thlak danglam a, season 11 chhungin tum hnih Europa League a chawi pui tawh a, La Liga title pawh tum hnih an chawi tawh bawk. 

Atletico Madrid hian Spanish Cup an lak tawh bakah Champions League final tum hnih an lut tawh bawk. Tin, a rawn awm atang chuan top-four hnuai lamah an awm ngai ta lo. 

Khawvel football  manager tha ber pawl leh hlawh hnem ber Simeone hian nikum khan a contract chu 2024 thleng a pawt sei leh tawh bawk. Tunah hian Europe manager zinga club ngai enkawl rei ber a ni mek a, Atletico Madrid hi kum 10 leh thla 6 zet a kaihruai tawh a ni.