Hei hi Pathianni zana Brighton-in Southamton an hneh chiaha anmahni tantute au hla a ni a; ni e, a vawi khat nan Seagulls hi Europe khawmualpui huap intihsiaknaah an inlan ve dawn.

Kum 18 mi lek, Evan Ferguson-a goal hnih leh Pascal Gross-a goal hmangin tla chiang tawh, Saints chu 3-1 in an hneh a, paruknaah insawh nghetin Aston Villa-in la umphak thei mah se a chhe berah season tharah hian Europe Conference League talah an inlan phak dawn tih a chiang ta.

Seagulls hian khelh hnih an la a, point khat an hmuh theih phei chuan inelna sang zawk, Europa League-ah an inlan dawn tih a chiang ta bawk.

Amex Stadium-a inkhel a tawp rualin anmahni tantute chu, ‘We’re all going on a European tour’ tia an zai rual dual dual pawh a âwm lo hran lo va, kum 1901 daih tawha din kha niin kum 123 an ni tawh a, an kum 124-naah khawmualpui huap inelnaa inlan thei ve tur chiah an ni hi an lawmna a sang hi a mak hran lo a ni.