Football pundit-ten an inkhelh hmain ‘a chak lo zawk zawk an tla ang’ ti hiala tlak hlau team hnih inkhel pawimawhah Leicester City chuan an mikhual, Everton chu 2-2 in an hnehtawk a, Toffees-in point an hawn chhan bul ber hi England No. 1 Jordan Pickford-a tui um vang a ni!

Foxes hian 2-1 a hma an hruai laiin penalty an hlawh a, Pickford hian England tana a khelhpui, James Maddison-a pet chu a dansak.

Thlalaknaa goalkeeper tui um an han lak chian chuan a pangah thil a inziak rang ruai a, Maddison-a penalty pet zinga 60% chu a laiah a pet a, ‘a laia din tlat tur’ tih a inziak tel.

Pickford-a hi a laiah a ding tlat reng a, a dansak.

England midfielder hian pet lut sela chuan 3-1 a ni dawn a, Everton tan point hlawh ngaihna a awm tawh lo thei a, Premier League-a inham tan ngaihna a awm tawh lo tura ngaih a ni a, hei vang hian inkhel tawpah fan pungkhawmten, ‘England number one, England number one,’ tia an au pawh a mak lem lo.

“Ka homework ka ti,” tiin inkhelh zawhah kum 29 mi, Pickford chuan Sky Sports hnenah a sawi a. “Player tha a ni a, che turah min ngai a, vawi hnih ka chet danah ka bum a.  Hun pawimawh a ni a, ka dansak thei kha ka lawm a, chu chu he hmuna ka awm chhan pawh a ni,” tiin a sawi.

Everton che tha lo mah se February thlaa kum 2027 thleng Goodison Park-a cham zui tuma inziak nghet, Pickford-a hian Premier League-ah kum 2019-a Newcastle tana Matt Ritchie-a pet a dan hnuah vawi nga a danna a ni ta a, a dan apiang hi pawimawh tak a ni hlawm bawk.

Leicester goalkeeper hlui, Kasper Schmeichel chuan Pickford-a tui um tactic chu, “Thil chin uar tak a ni a, kei erawh chuan ka ti ve ngai lo.Che lova a laia awm tawp mai kha a mak a, a huaisen thlak bawk a, a bikin engkim tawpna a nih theih lai leh 3-1 a nih mai theih laia khatianga tih kha chu a huaisen thlak tak zet,” tiin England keeper a fak.

King Power Stadium-a inkhelah hian Dominic Calvert-Lewin chuan minute 15-ah Everton tan goal hmahruai a khung chu Caglar Soyuncu-a’n minute sarih hnuah a sut a. Minute 33-ah Jamie Vardy chuan thun belhin hma an hruai a, chawlh lawk atanga minute liah Maddison-a chuan penalty a hlah a, Alex Iwobi chuan minute nga hnuah Toffees goal phurh a sut zui ta a ni.

Point khat ve ve an insem hnuah Foxes hian tlahniam thei dinhmuna an din chhuahsanin 16-naah an kai a, Everton erawh 19-naah an la awm zui a; mahse, Leicester an phak lohna hi point khat chauh a ni a, khelh li la awmah Leeds United leh Nottingham Forest te nen tla thei leh awm zui thei vek an la ni hlawm.