ZALEN August 9, 2026: Co-ordination Committee on Ex-MNA Association & PAMRA chuan ‘nunna tam tak leh thisena an hlawh chhuah’ remna thuthlung sawi dal an phal lo tih an sawi.

Nimin khan Aizawl Press Club-ah chanchinbumite kawmin Ex-Mizo National Army leh Peace Accord MNF Returnees Association hruaitute chuan tun hnaia chief minister-in remna thuthlung leh ILP a sawi dan chu an duh lo hle tih an sawi a. PAMRA President Vanlalbiaa chuan, “Mizoramin remna thuthlung kan neih, a rah kan seng mek hi nunna tam tak leh thisena kan hlawh chhuah a ni a, chief minister-in sawi nep leh sawi dal phet a tum reng ta mai hi thinrimthlak kan ti a, remna thuthlung hmang thiam lo leh hmang ngam lo anih chuan thuneihna a chan mek hi midang kutah hlan mai se tih hi hnam sipaiten kan duhdan a ni,” a ti.

Pawl pahnih hruaitute chuan remna thuthlunga hming ziaktute hi MNF aiawhin Laldenga President, India sawrkar aiawh in RD. Pradhan Home Secretary Govt of India, Mizoram sawrkar aiawh in Lalkhama Chief Secretary Govt of Mizoram te an ni tih sawiin Mizoram leh India sawrkar inremna thuthlung thu bul chang 8 naah Inner Line Regulations tuna Mizoram hman mek hi Mizoram sawrkar rawn lo chuan siam danglam emaw paih emaw theih a ni lovang tih a chuang niin an sawi.

Pawl pahnih hruaitute chuan, "Chief Minister dinhmuna ding mek hi Mizoram leh hnam himna khawih thilah chuan huaisen taka mipuite hmaa ding tura beisei a ni a. Hetihlai hian pawn lam atanga nawrna pawh awm si lova kan ram leh hnam inhumhimna kulh pawimawh tak 'Central sawrkarin a duh chuan min thiahsak thei' tih a sawi hi vanduaithlak kan ti a. 

Hnam sipaiten thisen leh nunna tam tak senga kan ram leh hnam humhimna tur kan lo hlawh chhuah ve te a ti derthawngtu leh a sawi neptu-a a tang ta zawk zel mai hian kan rilru a ti na a, engamah hmaa Central sawrkar laka dawl zawra zawr nghal ringawt, Remna thuthlung hmang tangkai ngam lotu leh ti bawrhbangtu hi Chief Minister dinhmuna ding zel tlakah pawh kan ngai lo a ni," an ti bawk.