Aizawl: Nimin khan Loch Hall, 46 Assam Rifles ah Assam Rifles Ex- Servicemen, Mizoram chuan Rally, 2017 an hmang a, Mizoram Governor Lt.Gen Nirbhay Sharma, (Retd.) chuan khuallian niin a hmanpui. Governor chuan Mizoram chhunga Ex-Servicemen te chu an inthlung tha a tih thu a sawi a. Mizoram hmun hrang hrang a fankual tawh atanga a hmuhdan chuan khawtinah ex-servicemen te mi zahawm leh entawn tlak vek nia a hmuh thu a tarlang a. An that lai hunte India ram venhimna atan hmang tawh mahse ram leh hnam hmelma ruihlo chi hrang hrang, HIV leh thil thalo dang do kawngah te pawh sawrkar, tlawmngai pawl te leh vantlang pui chhunzawm zel turin a chah a ni. Assam Rifles Ex- Servicemen Rally ah hian Ex-Servicemen te tan man lova doctor rawn theihna hun leh an harsatna hrang hrang awlsam taka chinfel theihna tur hmun te hawn a ni a. Rally puala inkhawmna hun Loch Hall-a buatsaih hi Brig. MS.Mokha, DIG, Assam Riffles in a kaihruai a, sipai huaisen fam tawh te aiawhin an nupui te hnenah lawmman sem a ni.