ZALEN June 1, 2026: Vawiin khan Excise & Narcotics Department Commissionarate, Aizawl-ah Central YMA hnenah ruihhlo dona atana hman tur lirthei hlan a ni a. He hun hi Excise & Narcotics Department Secretary C. Lalruaia, MPS in a kaihruai a, He programme-ah hian T. Lalramzauva, Dy. Commissioner (Admn.), Excise & Narcotics Department-in report pe in, Central YMA President R. Lalngheta leh Excise & Narcotics Minister Lalnghinglova Hmar ten thu an sawi.

Central YMA President R. Lalngheta chuan ruihhlo dona kawnga harsatna tam tak an tawh kara lirthei thar an dawng leh chu lawmawm a tih thu a sawi. "Excise Department leh YMA thawhhona hi a chhe ngailo a, zanlai pawh sawi lovin a tul hunah an chechhuak zel thin hi a lawmawm hle. Minister, ruihhlo dova a phur hian YMA te min ti phur em em a, Excise Commissioner leh OC te pawh fakawm kan ti," a ti.

Thawhhona tha zawk neih chhoh zel beiseiin, Pu Lalngheta chuan, "Keini lam hauh kan tul pawhin min hau hreh lo ula, mit tikham kan awm chuan min hrilh hreh lo ula, a tul angin kan inthunun/chawlhtir zel ngam. Nasa leh zual zawka thawkho zel turin kan insawm," tiin a sawi bawk.

Excise & Narcotics Deptt. Minister Lalnghinglova Hmar chuan vawiin hi ni chhinchhiah tlak a nih thu sawiin, "Mizoram-a ruihhlo dona kawnga pawl thawhhlawk tak, YMA in ruihhlo an dona atana lirthei an dawng hi a lawmawm hle. Ruihhlo do kawngah hian PPP (Public-Private Partnership) ang takin kan kal a ni ber mai," a ti.

NCB (Narcotics Control Bureau) te pawhin YMA hmalakna an hriat thu leh Mizoram-a office neih an duh thu a sawi bawk. "Tun hma aia kan thawhhona tha neih a tul lehzual. Mahni hun laia theih tawp chhuah hi hriat reng an ni thin," tiin a sawi.

Heng Motor te hi March 15, 2025 a Union Home Minister in Aizawl a lo zin tum a, Central YMA ten ruihhlo dona tur Motor an lo dil kha a ni a, Motor 6 bakah hian Mahindra Bolero Camper 3 a la thleng lova, a thlen hunah Central YMA hnenah hlan leh a ni ang. Vawiina Central YMA hnena Motor hlan te hi Ecco Van 3 leh Mahindra Bolero Camper 3 an ni.