ZALEN December 18, 2025: Excise & Narcotics Department te chuan an thudawn bawhzuiin nizan khan Lammual-a neih mek Winter Festival-a stall thenkhat chu an endik a, he hmuna inpho stall 5 mi te chu zu kaihhnawih avangin an man.

E&ND te hian Winter Festival 2025-ah hian wine leh fruit beer kaihhnawih zuar phalna nei lo report an dawn bawhzuiin nizan khan hma an la a, heng zuar te hi an endik hnuah an thil zawrh chu dan phal loha siam a ni tih an hmuchhuak a, an man zui ta a ni.

Excise hotute'n ZALEN an hrilh danin wine leh a kaihhnawih zawrh hi phalna nei chauh tan siam leh zawrh tur a ni a. Tun dinhmunah an thil siamchhuah zawrh chhuah tura pe chhuak thei chu factory 3 chiah an awm a. Champhai-a factory pahnih leh Hnahlan-a factory pakhat te niin vendor te'n an zuar tur a ni nghe nghe a ni.

An thil siamchhuahah hian FSSAI (mipui tana eitlak) phalna a intar a ngai a, FSSAI nei lo ho chu an thil zawrh te mipui tan a him loh theih avangin man an nih thu an sawi bawk. Hetih rual hian FSSAI nei mahnia wine leh a kaihhnawih siam an awm ve bawk a, Excise phalna an neih loh chuan an zuar chhuak thei chuang lo a ni.

Excise te'n an endik stall panga atanga mante hi lock-up ah khung an ni a, thubuai erawh siamsak an ni dawn lo tih E&ND lam chuan an sawi a, ti lui an awm leh anih chuan an chungah hmalak a nih tur thu ZALEN an hrilh. Excise lam chuan zu, beer, wine leh a kaihhnawih zawrh khap hi sawrkar dan ding lai a ni a, thlai atanga siamchhuah phalna nei chauh in an siamin an zuar thei a, hei vang hian Lammual-a stall nghak tur pawh hian an hre tura ngaih an ni a, organiser lam pawh hre tura ngaih sa an nih thu an sawi bawk.

E&ND te hian Nilaini khan chanchinthar thehdartute an Minister Lalnghinglova Hmar hovin an lo kawm tawh a, he hunah hian thlai leh theirah atanga siam theih Wine leh Fruit beer te hi license nei lo tan siam leh zawrh phal loh a nih thu an sawi a, heng license nei tur hian a nei sa Champhai leh Hnahlam lam te bak atangin dilna an la dawn loh thu an sawi a ni.