EXIT TEST : Mizoram-ah WHO leh ICMR guidelines hmang ve tawh dawn

Admin - Jul 20, 2021

Covid vei tan chhuah dawnah test neih kher ngai ti tawh lo?

Aizawl : Vawiin khan Chief Secretary Conference Hall-ah Health Minister Dr. R Lalthangliana, Medical Operation Team Chairman Dr. ZR Thiamsanga bakah Dr. C Lalhrekima leh Dr. J Lalramchhuanga te chuan chanchin thehdartu te an hmachhawn a, Mizoram chuan Indian Council of Medical Reasearch (ICMR) leh World Health Organization (WHO) ten kum khat chuang kalta atanga an lo hman tawh, khawvel ram tam zawk leh India state dang te pawhin an zawm mek, covid-19 vei enkawl te an dinhmun azirin test kher lova chhuah zalen an nih tawh tur thu an sawi. 

Tuna exit protocol thar ang hi chuan covid-19 hri kai te chu an inenkawlna hmun, quarantine centre a ni emaw, ZMC-ah a ni emaw, ni sawm an awm a, hemi hma ni thum chhunga anmahni-ah natna langchhuak a awm tawh loh chuan test kher ngai tawh lovin chhuahtir tur a ni tawh ang. Hei hian natna benvawn nei bik te erawh a huam dawn lo thung. 

He hun kaihruaitu Dr. R. Lalthangliana chuan hri vei dam tawh te chhuah tir dan tur kalphung thar tur hi hman a hun ve tawh tih a sawi a, kum khat zet ram changkang zawk leh India state tam zawk ten an hman tawh a nih thu a sawi. "Mithiam ten him tura an ngaih a ni a, a hmang tawh ten an la chhunzawm zel. Keini lam hian himna kan ngaihpawimawh avangin mi dang zawng aiin kum khat chuangin kan hmang har a, kan mithiam ten zirchianna rei tak an neih atangin, a him lohna kan hre lo a ni," a ti.

MOT chairman Dr. ZR Thiamsanga chuan rei tak tak inkhung ang chi pawh kalsan a hun tih a sawi a, mi in symptoms an neih tawh chuan a rang lama test neih nghal zel tur a nih thu leh ni sarih nghak kher ang kha tih kher a tul tawh loh thu leh test neih zung zung hi kan him phahna tur zawk a nih a beisei thu a tarlang bawk. Inrinni atanga kalpui tan sample test runpui chu chhunzawm zel a nih tur thu leh state capital-ah inkaichhawnna hi chhutchah a nih hunah district dangah pawh sample test runpui hi chhunzawm zel a nih tur thu a sawi. 

Mizoram-in Exit protocol thar a hman tur chungchang sawitu Dr. J. Lalramchhunga chuan Covid-19 chu hri thar anih avangin zirchiana hriat belh zel a nih thu a sawi a, "A tira he natna laka inven dan tur kaihhruaina siam te pawh thlak danglam thin a ni a, tuna WHO, ICMR, CDC (US), Korea CDC te pawhin an zawm tak inkaihhruaina hi May 27, 2020 a revised kha niin hei hi khawvela ram changkang te pawhin an hman a ni," a ti. 

Dr. J Lalramchhuanga chuan hetiang hunah hi chuan natna an kaichhawng tawh lova ngaih a nih thu leh test ngai tawh lova chhuahtir tawh tur an nih thu leh exit test kan kalpui thin dan hi ram changkang leh state lian te pawhin an kalsan tawh leh kal phung thar hi hman vek tawh zawk a nih thu a sawi. Chu tih rualin  natna benvawn nei te erawh test paltlanga lova chhuah an nih loh tur thu a tarlang thung.

He huna thusawitu dang Dr. C Lalhrekima chuan, exit protocol thar chu natna lanchhuah dan behchhana inenkawlna tur (symptoms based strategy) a nih thu a sawi a, science thiamna hmanga him tawka ngaih a nih thu a sawi bawk. Tuna Covid-19 natna hi a symptoms lan hma ni hnih leh a lanchhuah hnu ni nga chhung hi inkaichhawn awlsam lai ber tiin, Mizoram-ah erawh chuan hrikai te sulhnu hi symptoms a lan hma ni li thlenga an la chhui tur thu a sawi. 

RAgT chu hnualsuat chi a nih loh thu leh RT-PCR khawl anga thova rintlak a nih thu Dr. Hrekima chuan a sawi a, Mizorama kan vaccine hman Covishield pawh a him tawk mai bakah a rei tulh tulh a rintlakna hriat tur a tam tawlh tawlh thu a tarlang. Covid vaccine la ten a hriat chinah harsatna liantham tawk an la awm loh thu a sawi naah, an huat palha a enkawlna tura an inchhawp thin, Adverse event following immunization (AEFI) kit chu mi nuai 5 chuang an chiu tawh atangin hman ngaihna a la awm loh thu a sawi.

Share now