Aizawl: Lammual a North East Trade Expo huaihawttu Ranjan B.Gohain chuan India Danpui in a khua leh tui te chu khawi hmunah pawh sumdawn a phalsak avanga phalna lak ngai lo nia sawiin Aizawl DC in Expo titawp tura thu a pekna chu khap theihna dan Mizoram in a neih loh avangin High Court, Aizawl Bench ah a khin thu a sawi a, MIMA te chetdan chu dan bawhchhiatna a nih thu press mite a hrilh bawk. Nimin khan Gohain hian Aizawl Press Club ah chanchinbumite a kawm a, India danpui Article 19(g) angin khawi hmunah pawh sumdawn a buatsaih thei tih a sawi a. “Trade Expo ka tih dawn hian license/permit hranpa lak a tulloh avangin leh tun dinhmunah Mizoram ah non-tribal sumdawn khuahkhirhna (restriction) dan a neih loh vangin phalna lak a ngaih ka hre lo,” tiin a sawi a. “Trade Expo ah hian a theme pakhat atan “Say ‘NO’ to plastic bags and ‘YES’ to bio-degradable bags” tih hmang turin Forest Deptt. endorsement pawh min pe bawk a. DC atanga phalna lak tul ‘aurinna’ hman phalna a neih thu leh Taxation ah VAT Rs. 50,000 pe lawkin AMC ah banner tar phalna a lak te chu Expo behbawm atan a lak niin a sawi a, “Hnam dang trade license khuah khirhna dan Mizoram-in a nei lo a, a hrana phalna pe theitu an awm lo a, Expo nei tura trade license lak a tulna a awmloh vangin phalna hi ka la lo reng a ni,” a ti. Gohain-a chuan Trade Expo chu mipuiin an hlut em em laiin MIMA chuan an tihbuai reng vangin Civil Court-ah a dinhmun chu thlen in ni 5.5.2015 ah MIMA ho chu tibuai tawhlo turin a hriattir lailawktih a sawi a, Aizawl Police Station pawh a tul anga hma la turin a hriattir tih a sawi bawk a ni. Mahse MIMA hianan la tibuai reng tho nia sawiin MIMA-in complaint an siam bawhzuiin Aizawl DC chuan Section 144 Cr.PC hnuaiah Trade Expo chu thuneitute hnena phalna lak a nih loh avangin a kharsak ta tih a sawi a.. “Khawi thuneitu nge tih leh eng ang phalna nge lak ngai tih leh khawi dan hnuaiah nge lak tur tih tarlan a awmlo,” niin Expo huaihawttu chuan a sawi a ni. Trade Expo huaihawttu chuan sum puk chawpa buatsaih nia in sawiin tihtawp sak a ni chu channa nasa tak niin diklohna engmah nei loa an in hriat avangin High Court ah hian an kal ta niin a sawi bawk. Expo a dawr hawngtute pawhin ruah leh thliin an bungrua thahnem tak a tihchhiat tawh bakah an thil neih te an zawrh theihloh bawk avangin ei leh in mai bakah haw lehna tur thlengin harsatna an tawk niin an sawi bawk.