ZALEN, May 02, 2026: Aizawla Electric Veng Branch YMA chuan pawl kua zir tan tur leh pawl 10 leh 12 zir zotena an zir chhunzawm dan tur inkawhhmuhna leh infuihtharna, Career Fair chu Inrinni nileng khan an buatsaih a, kum dang ang bawkin zirlaiten an hlut leh hle.

EYMA Literature & Education Sub-Committee buatsaih Career Fair hi an YMA Hall-ah Home Minister K. Sapdanga’n a hawng a. An veng leh veng thenawma sikul hrang hrang an sawm a, zirlaiten an hlutin tlawhtu an tam hle a, nu leh paten an hruaite an awm bawk.

Arts, commerce, science, special education, law, mass media & communication, management/baking, hospitality/tourism, military, territorial army, medical, engineering, handmade business, fashion designing leh cruise-a tui mite tan stall hawn a ni a. Hetiang lama hlawhtlinna nei tawh veng chhung mi thiamte rawn theihin an thu bawk.

Heng bakah hian Booktale, Beer Seba Group of Institutions, Medhavi Foundation, Women’s Polytechnic Aizawl, R&D Consultancy-te tel turin sawm an ni bawk.

Home minister chuan thil hautak, a buatsaihtu changkan ngai, a chhimtute thil chik mi leh thil tih tak tak tum, hetiang ang mite tana kawng kawhhmuhna hun a biala YMA-in an buatsaih thei chu lawmawm a tih thu leh chhuanawm a tih thu a sawi a. Zirlaite chu tum mumal nei chunga an lehkha zir chhoh zel nan fair hmang tangkai turin a chah bawk.

Zirlai naupangten lehkha an zir zelna turah kawng dik leh ngaihtuahna fing an neih theihna tur leh eizawnna kawng an zawh huna hlawhtlinna an neih theih nân EYMA Literature & Education Sub-Committee hian career fair hi kum 2023 atang khan kum tin an buatsaih thin a ni.