Aizawl: Nimin khan Chief Secretary’s Conference Hall-ah Ministry of Drinking Water & Sanitation Secretary Parameswaran leh Mizoram Sawrkar Official-te chuan faina kawnga Mizoram sawrkar hmalakna te thlirletna leh sawihona hun an hmang. Parameswaran Iyer, Secretary, DWS chuan Mizoram sawrkar hmalakna chu chhuanawm a tih thu a sawi a. India ram state dangte entawn atana thil tha tam tak Mizoram sawrkar hmalakna hnuaiah a hmuh avanga a lawm thu sawiin Mizoramin Swacch Bharat Mission hmalakna awm hma atang tawha thianghlimna kawngah theihtawp an lo chhuah thin avangin Mizoram mipuite hnenah faina kawnga zirtirna pek belh a harsat loh tur thu a sawi a. District tina chhungkaw tinten anmahni puala ekin thianghlim an neih thuai a beisei thu sawiin Open Defecation Free state chu Sawrkar laipuiin tanpuina sum pek kawngah a duhsak bik dawn bakah lawmman siamsak a tum thu a sawi a ni. Swacch Bharat Mission hnuaia Sanitation hmalakna Report in tarlan dan chuan Champhai District chiah, daikala zun leh ek thiar awm tawh lohna, Open Defecation Free (ODF) District a la ni mek a. Hetih lai hian District dang 3 pawh ODF ah puan thuai theih turin hma an sawn a tih tarlan niin heng district 3-a Bawrhsap te pawh in ODF ah puan an nih har tawh loh tur thu an sawi a ni. Tun dinhmunah, Aizawl District-ah chhungkaw 3205, Kolasib District-ah chhungkaw 1225, Lawngtlai District-ah chhungkaw 12,072, Lunglei District-ah chhungkaw 5996, Mamit District-ah chhungkaw 3519, Saiha District-ah chhungkaw 3307 leh Serchhipah chhungkaw 1390 ten ek in pangngai (Sanitary toilet) la nei lovin Mizoram pum puiah ek in sak hmabak chhungkaw 30,714 an awm a ni.