Kum tin India hnampa Mahatma Gandhi piancham chawlhkar hi 'Faina hapta' atan hman thin a ni a, kumin ah pawh hian fai inzirtirna leh pawimawhna atan hun hman leh tum a ni.

Mizote hi tunhma chuan hnam bal leh tawp, hnam hrisel lo tak kan ni a tih theih awm e. Zosap missionary thenkhat te phei chuan kan balh zia kha hahipin an sawi a, mi thahnemngaite hmalakna azarah tunah chuan India ramah pawh a fai pawl kan ni chho ta hial mai hi thil lawmawm tak a ni.

Mizote hi thuawih thei tak mai kan ni a, kan ram hruaitu ten fai pawimawhzia min han zirtir chuan kaihhruai kan lo nuam hle mai a. Inelna kalpui a nih hnu phei chuan Aizawl leh district khawpui te ai mahin thingtlang lam khua ten faina kawngah hma an sawn zawk emaw ni aw a tih theih rum rum mai.

Aizawl ah pawh khawpui enkawltu Aizawl Municipal Corporation in kawr leh hmun remchangah te bawlhhlawh paih mai mai lova a paihna hmun ngeiah paih tur a ni tia thupek an siam chu mipui ten kan zawm tha hle a. Tunah phei chuan hmun remchang apiangah lirthei hmangin bawlhhlawh khawn a ni a, kawr leh hmun remchanga bawlhhlawh paih mai mai lovin motor-ah ngei paih na chang kan hre ta zel a, thil lawmawm tak a ni. Aizawl pawh tunah chuan state khawpui zinga khawpui fai ber pawl a ni ta hial mai.

Hetih laia kan khawpui titawptu ber chu zuk leh hmuam kan tihna hi a ni. Bawlhhlawh dang paih kawngah chuan hma sawn viau tawh mah ila zuk leh hmuam kan tihna, a bikin khawlaia mei bung leh kuhva eina paih tam lutuk hi chu a zahthlak zia kan hriatthar leh a tha khawp mai. Zuk leh hmuam ti thin te hi puitling te an ni a, chuvangin kum lama upa zawk ten bawlhhlawh paih kawngah tun aia tan kan lak thar a ngai tih a entir a ni. Zuk leh hmuam tihna hnu hi paih mai mai lovin a paihna hmun tur dik takah paih ila chuan tun ai hian kan fai lehzual ngei ang. Naupang zawk te hian kan tihdan an entawn a, kan nungchang an zir a ni tih hria in anmahni entawn tura fai kawngah tun aia kum lama upa zawk ten tan kan lak phawt chuan Mizoram hi India rama hnam fai ber kan ni thei ang.