Aizawl; Transport department thawktute chuan mi thenkhat an chhungte driving license pe thuai tura department thawktute nawr thin an awm tih an sawi a, hei hian an lu a tihai thin hle tih an sawi bawk. Hetih lai hian driving school neitute chuan license chungchangah hian fair takin thil an ti thin tih Zalen an hrilh. Zalen palaiin a biak naah Transport thawktute chuan driving license nei tur chuan leaners license an nei a, an thiam hnu ah test leh phawt a ngai tih an sawi a. Hetih lai hian nu leh pa tam takin anmahni chu license pe thuai turin an nawr thin niin an sawi a. "An tana tha tur kan sawi pawhin mi thenkhat chuan kan thahnemngaihna te lung loh ah an la mai thin a, chuvangin mipui lam hian dan anga kal hi an tlin lo em ni tih mai a awl thin a ni,” an ti. Transport thawktute chuan license holder te chu an thil zir hrang hrangte a taka hmang thin turin an ngen tih an sawi bawk. Mi thenkhat ten Driving School ten an hnuaia zirte license an hmuh sak zung zung nia sawi chu an dik lo tih an sawi a. Timothy Driving School neitu F.Lalbiakenga chuan, "Kan naute hi rules & regulations, road sign leh thil pawimawh hrang hrang kan zirtir vek a, license hmuhsak kawngah pawh dan ang thlapin thil kan ti a, keini aia fair hi an awm lo ang," a ti. F.Lalbiakenga chuan an school chu sawrkara in register vek, MVI ten an enfiah reng thin anih thu a sawi a. Lirthei chesual khalhtu zingah an hnena zir aiin an zirtir chhuah nilo an tam zawk nia a hriat thu a sawi bawk. November ni 3 khan Transport Minister John Rotluangliana hovin district hrang hrang DTO leh driving school neitute chuan meeting neiin lirtheia chetsualna a tlem zawk theih dan tur an sawi ho a, he huanah hian Minister chuan driving school neitute chu license pek tlak lohte pe lo ngam turin a chah a ni. Driving School hi Aizawl ah 9- Timothy, Siakeng, Fanai, Samuel, Quality, Emy, Rogary, Cindy & Puipui leh Aizawl Driving School te an awm a. District khawpui hrang hrangah a awm bawk nia thudawn a ni.