September 23, 2022; Tunhnai ah Falkland veng a thalai rual intibuai lai video social media a a 'viral' hnuah, Falkland Vigilance Committee leh police ten ngawrh leh zual zawkin duty an kalpui dawn a, buaina siam leh ruihtheih thil nen a khawsa te chu man zel an ni dawn.

Falkland Vigilance Committee hruaitute hnen atanga ZALEN thudawn danin, September ni 22, 2022 khan Bawngkawn police te nen duty kalpui dan tur ruahmanna an siam a, chumi ang chuan, zan dar 11 vel thleng Falkland khawtlang lamin duty an kalpui ang a, chumi hnuah Bawngkawn police te duty chhunzawmin, ruihtheih thil leh buaina siam zawng a khawsa te chu man zel an ni dawn a ni.

Falkland Vigilance Committee hruaitute chuan khawtlang angin duty an kalpui reng thin tih an sawi a, amaherawhchu zanrei ah te duty an kalpui reng thei lo tih an sawi. "Len pangngai a rawn lengte erawh zalen takin rawn kal rawh se, amaherawhchu ruihtheih thil nen a buaina rawn siam erawh ngaihnathiam an ni tawh dawn lo," an ti bawk.