ZALEN August 14, 2026: Aizawl South & Aizawl North Treasury Office buatsahin vawiin khan 'Sensitisation on Voluntary Surrender of Pension Payment Order' neih a ni a, he hunah hian dan lova family pension la mek te September 30,2026 hmaa an in surrender theih hun hawn mek chungchang inhrilh hriatna neih a ni. Kohhran hrang hrang Headquarter hruaitute sawm niin aiawh pahnih theuh an kal a, sawihona hun hman a ni bawk.

He hunah hian Malsawmdawngliani, Director, Local Fund Audit & Pension chuan pension la thei lo tur tam takin dan lova pension an lak thin avangin sawrkarin kum tin a crore tel a hloh thin thu a sawi a, sawrkar hnathawk te hlawh tih lovah chuan pension expenditure chu sawrkar sum sennaah a sang lawr lak a ti.

Local Fund Audit & Pension Director chuan pensioner te an thih hnu hian an aiawha family pension la tur ten an tih tur hrang hrang sawiin, la thei tur mamawh, certificate/document hrang hrang a awm a, hengah te hian Kohhran hruaitute chu dan dik lo a pension lak tum te document pechhuak lo turin a ngen a, family pension la thei lo tur induhsak avanga Kohhran-in lehkha an lo siam sak avanga la te an awm a ti a, hetiang hi thleng tawh lo se a duh thu a sawi. Family pension dan dik lova lak tum certificate/document lem siam hi an thahnem hle a ti.

Malsawmdawngliani chuan pension chu mi tam takin ro angin an ngai emaw tih mai turin la thei tawh lo tur pawhin lak hram dan an ngaihtuah a, an lak lo khan luangral mai mai tur angin an ngai a, hei vang hian sawrkarin sum tam tak kum tin a hloh phah a ni a ti a. Dan dik loa family pension lak hi eirukna a ni a, Document dik lo pek chhuah leh document dik lo hmanga family pension lak hi dan bawhchhiatna a ni, a ti.

Director chuan Mizoram sawrkar Finance Department hmalakna-in dan dik lova 'Family Pension' la te tana inhnuhdawh hun a hawn chhung, September thla chhung ngei a inhnukdawk tura an beisei thu a sawi a, an inhnukdawk lo a nih chuan an chhui zui dawn a, pension la te chu list an neih sa vek avangin an tan chhui chhuah a harsat dawn lo a, hun tiam chhunga family pension surrender te chu ngaihdam an ni ang a, surrender lo chhuichhuah te chu ngaihdam an nih loh tur thu a sawi bawk.