DOWNLOAD OUR APP

Read latest news on your phone
app-store

Fashion khawpui Paris-ah NE designer; Milan lam hawi zui; London-ah puan chei chhuhsak

Oct 10, 2015

Fashion khawpui Paris-ah NE designer; Milan lam hawi zui; London-ah puan chei chhuhsak

India hmarchhaka thawmhnaw duang (design)-tu hmeichhe pakhat chuan London khawpuia a thawmhnaw duante an pho chhuah hnuah hmarchhak mite incheina pho chhuaka tilar turin fashion hmunpui, Milan leh Paris te chu luh leh a tum mek a, thlir pawh a hlawh viau a ni. Puanchei hi Mizo incheina a nih avangin he dseigner hian phalna a nei em? tih ngaihtuahna seng an awm nuala, Patent a la nih loh vangin eng vak a la tih theih loh niin thudawnna chuan a sawi a. Patent turin Joseph Lalhimpuia Parliamentary Secretary hova buaipui mek a ni. ‘Mizo te khawhawi tawi luat a ni a, kan hnam kutchhuak dangte pawh khawvel hmaah pho a la ni lo a, a theih niin kan ngai lo tlat a. Sum hlawhchhuah nan pawh a hnar tha a ni a, harh a va hun em! London-a Mizo puanchei min chhuhsak niah ka ngai,’ tiin designer pakhat chuan ZALEN a hrilh. NE kilkhawr Arunachal Pradesh nula Yana Ngoba-i chuan India NE tribal-te incheina chu tunlai mite mila her danglamin tun hnai khan London khawpuiah a pho chhuak a. Hlawhtlinna a chan hnuah global fashion capital pahnih, Paris leh Milan lam a hawi leh mek a. Ngoba hi AP-a mi tho, designer Nabam Aka nen tangdunin London Fashion Week-a off-schedule show Fashions Finest-ah an thawmhnaw duante an pho lang a ni. Ngoba chuan, “Kan thawmhnaw duante hi Mizoram, Manipur, Arunachal, Nagaland leh Assam-a mite inchei dan zulzui a ni a. Heng hnamte incheina hi gown, pawnfen leh tlereuh lam belin kan pho chhuak a ni,” a ti a. “London mipui te pawhin nalh an ti a, hetiang tak hian India ramah hnam hrang an lo tam ang tih pawh an lo suangtuah pha lo hial a ni,” tiin a sawi thu thulakna chuan a tarlang. Ram dang mite ngaihdanah chuan India mite thawmhnaw lei thin tlangpui chu saree a ni a; mahse, an thawmhnaw pho chhuahte chu chutiang lam a nih si loh avanga zawhna pawh a dawn nual thu a sawi a, “Keini chu hmarchhaka mi kan ni a, kan culture a dang daih alawm,” tia a chhan thin thu a sawi a. Hmarchhak mite culture chu milem leh video hmanga a pholan hnuah tam tak an hralh a, tam tak order a hmu niin thulakna chuan a sawi bawk. Ngoba chuan “Milan Fashion Week chu kan telna turin tihchian a la ni lo va; mahse, kan inlan ngei theih ka ring a. Fashion-te hi heng khawpui lian - London, Milan leh Paris atanga chhuak deuh zel hi a ni a, heng hmuna inlan theih hmasak hi a pawimawh a ni,” a ti niin thulakna chuan a tarlang.
Share now