ZALEN September 22, 2025: ZPM party chuan vawiin khan chhung inkhawm an hmang a, Chief Minister Lalduhoma chuan thu sawiin, “Central sawrkar hi kan ngai sual lutuk a, min chim ral a, kan ram leilung te min chhuhsak turah kan ngai a. Kan ram tana tha lo tur leh him lo tur hi chu ZPM party leh sawrkarna fawng chelhtute hian kan ti hauh lo ang tih ring ngam ang u,” a ti a, FCAA chu house-ah lungrual taka pass a nih thu a sawi bawk.

Chief Minister Lalduhoma chuan, “India ramah hian 1927-ah Indian Forest Act kan nei a, Bristish ho min siamsak a ni. British ho chu India ramah sumdawng turin an lo lut a, an duh ber chu India thau sawh a ni. India mipui tan leh tribal-te tan he Forest Act hi a tha vak lo a ni. India a independent a, keimahni kutchhuak ngei dan siam a ni a, Conservation of Forest Act hi India sawrkarin a siam ve ta a ni. Conservation tih chu JF Dictionary-ah chuan humna tiin a ziak a, Forest humna a nih chu. Dan tha zawk India sawrkarin a rawn siam chu Mizoramah pawh UT kan nih atangin chhum lo chat loin kan lo hmang char char tawh a ni,” a ti.

“He dan hi TN Godavarman chuan 1996-ah Supreme Court-ah a khing ta a, Supreme Court thutluknaah chuan community forest te, private ram te, sawrkar ram te, revenue ram te pawh a vaiin he case hnuaiah chuan Forest tih a lo ni ta a ni. Lal lal lai ata tawh khawtinin Village Safety Reserve-te kan nei thin a, YMA te pawhin ram humhalh te kan nei thin a, khawi khua emawin an khaw himna reserve area-ah an khaw zauhna tur emaw hmasawnna thil dah turte lo awm ta se Godavarman case-ah chuan clearance lak a ngai zel a ni,” a ti bawk.

“Godavarman case hi central sawrkar pawhin hnawksak an ti a, dan thar Conservation of Amendment Act 2023 hi an siam ta a ni. MNF sawrkar lai a ni a, guideline leh rules te kan la hmu bawk si lo a, a dan ringawt han thlir khan kan inhlauh siak ta a, a pawi ang tiin zir chianna a la awm lo nen resolution te pass in kan do a nih kha. Amaherawh chu, guideline te a rawn chhuak a, kan han zir chiang a, he dan hi kan mamawh zawk niin kan hria a, House-ah lungrual takin kan pass a nih kha. Assembly Speaker-in ‘Remti lo in awm em?’ a tih khan tumahin ‘Remti lo’ ti an awm loh avangin dawhkan beng chungin kan pass ta a ni,” tiin Lalduhoma chuan a sawi.