ZALEN Aizawl 9, 2025: Mizo National Front chuan thuchhuah an siamah Assembly Speaker chu Chief Minister dawt sawi, sawi mam sak tumah puhin mipui hmaa ngaihdam dil turin an phut a, Mizorama FCAA 2023 hmang ve tura ZPM sawrkarin Resolution a putluh Assembly-in a pass tak chhan chu India ram venhimna kaihhnawiha sum hnuh luh an inbeisei vang an ti.

MNF chuan Sawrkar liamtaah khan Mizoram Assembly chuan FCAA 2023 dodalna Resolution a pass a, a nih dan tur anga bawhzuiin, Assembly Commissioner hmingin Secretary General, Lok Sabha hnenah thlen a ni a. Mizoram Chief Secretary pawhin bawhzuiin file te pawh a nih dan tur angin a kal a, MLA inthlanpuiin a nang zui ta a ni. 

MNF thuchhuak chuan, "MNF sawrkarin FCAA 2023 dodalna resolution a lo pass tawh kha ZPM sawrkar lo ding ta hian a pawm zui ve mai tur a nih laiin, India ram venhimna kaihhnawiha sum hnuh luh theih an inbeisei vang chauhvin, a hmaa nasa taka an dodal FCAA 2023 chu Mizorama hman ve an duh leh ta thut a. 'MNF sawrkarin FCAA 2023 dodalna Resolution a pass a, ZPM sawrkarin FCAA 2023 Mizorama hman vena tur Resolution an pass thung a ni,' tih hi thudik dinglai a ni a."

"Ram neitu thinlung pu lo, sumdawng rilru leh sum ringawt duhna thinlung atangin he thutlukna hi ZPM sawrkar hian siam an ni tih a chiang em em a. Mahni sawrkar Resolution putluh ngeiah pawh sawrkar hmasate puhmawh tum zel leh mawhpuh tur dang dap kual chiam hi mawhphurhna lak ngam lohna, thil zahthlak tak, sawrkar puitling lo zia a ni tih Zoram mipuiten kan hriat reng a tul a ni," an ti.

Mizoram tana theihtawp chhuah mektu Joint Civil Society of Mizoram (JCSM) ten FCAA 2025 duhlohna leh a dodalna tura an hmalakna hi MNF chuan an thlawp tlat a. Ni 11.9.2025-a punkhawm an huaihawt turah pawh MNF Party mite chu kal vek turin an ti a, Mizo mipui zawng zawng pawh he hmalakna hi thlawp vek turin an ngen a ni.