ZALEN, September 08, 2025: Dan sawi hlawh tak ni mek, August 28, 2025-a Mizoram State Assembly session-in Mizorama hman ve tura pass tak, Forest (Conservation) Ammendment Act, 2023 (FCAA) chu eptu member thenkhatten rorelna ina pass danah an sawi hnawm mek laiin ‘lungrual taka pass zinga ngaih a ni’ tih Assembly Speaker Lalbiakzama’n a sawi ve thung.

Thawhtannia a pisaa thuthar lakhawmtute a kawmnaah speaker chuan, “Assembly House-a thurelte hi thlir dan hrang hranga sawiho thin a ni a, chumi hnuah house ngaihdan lak a ni thin,” a ti.

“Tun tuma FCAA chungchangah pawh khan ‘remti’ ka zawt a, remti an ti a, ‘remti lo’ in awm chuan ‘remti lo’ ti rawh u ka tih khan tumah ‘remti lo’ an awm lo,” a ti a. “Chuvangin, kha resolution kha lungrual taka pass zinga ngaih a ni,” a ti.

Thuthar lakhawmtute zawhna chhangin, “Kan session kha live-a chhuah a ni a, a en let vek theih a, keimahniin record kan nei bawk a. ‘Remti lo in awm em?’ tia ka zawh khan a reh vek, tumah ‘remti lo’ an awm lo,” a ti bawk.

A hnua eptu member thenkhatten pawn lama ‘rem an ti lo’ tih an sawi chhuah leh pawh, “An duh loh chuan house kha sawina hmun tur a ni a, pawna sawi leh si kha chu a puitling zia lo deuh ka ti,” a ti.

Session zawh hnu lama member thenkhatin FCAA resolution put luh chu zeh luh thut, inpuahchana leh inzirna hun awm lo anga an sawina pawh speaker hian chhangin session tan hma ni sarihah a lehkha (hard copy)-in MLA-te a inah pek an ni a, assemby website-ah pawh dah nghal a nih thu a sawi.

“Inzir hman tura ngaih an ni a, an inzir lo emaw, an lo inpuahchah lo emaw a nih chuan member-te mawhphurhna zawk a ni ang,” a ti.

Act leh rules copy hmu lo nia MLA thenkhatin an sawi pawh member-te hnenah pek an ni kher ngai lo niin a sawi a, a kaihhnawih act leh rules an hre duh a nih chuan library an pan thin a, chumi atan chuan MLA-te puitu tur pawh siam a ni tih a sawi.

FCAA reolution hi Forest & Climate Change Minister Lathansanga’n house-ah pu lutin sawiho a nih hnuah pass a ni.