Aizawl: Sairang Dinthar venga Food Corporation of India kudam tur chu buaipui mek a ni a, LSC pawh peih tep niin tunkar chhung hian tihfel hman a, FCI thuneitute hnenah land lease hi pek hman beisei a ni. FCS&CA Department thawktute hnen atanga thudawn danin FCI hnenah hian kum 99 chhung atan ram hawh tir a ni dawn a. Kudam atana ram lak tur pawh tihfel a ni tawhin eng emaw chinfel ngai tlem awm chu tunkar chhungin tihfel hman vek beisei a ni. Buhfai khawl (stock) chungchang zawhna chhangin FCS&CA thawktute chuan monsoon stock-na turah chuan an dah fel tawh nia sawiin, “October 2018 thleng daih chu kan khawl tawh a, engemaw harsatna dang a thleng a nih loh chuan hlauthawng lo turah kan in ngai,” tiin Zalen palai an hrilh. Gas chungchangah Borkhola Plant siam a nih avanga harsatna awm chu siam zawh a nih tawh avangin harsatna a ziaawm tawh niin an sawi a. Hetih lai hian Mualkhang Bottling Plant atanga gas pek chhuah erawh chu a phurh man a tlawm avangin harsatna a la awm hrih niin an sawi.