Aizawl: Mizoram University thawktute leh zirlaiten Ramrikawn a FCI Kudam chu ngaimawhin sawnchhuah thuai phut mahse Kudam thar tur hi tihfel a la ni lo a, fel mai thei pawh a la nilo niin FCI thawktute chuan Zalen an hrilh. Zalen palaiin FCI thawktute hnen atanga thu a dawn danin kudam thar tur hi hmun hrang hrangah en a ni tawh chungin a hmun tur tak tihchian a la nilo niin an sawi a. A hmun tur pawh duh ang hmuh ni mahse land acquisition te tih hnuah kudam satu tur Tender chhuah leh a la ngaih dawn chauh avangin hmanhmawh taka thil tih theih a nilo tih an sawi bawk. FCI thawktute chuan Ramrikawn a FCI kudam chu kum 1998 a din a ni tih sawiin kudam awm tirhin helai hmun vel hi ramhnuai vek a ni a. Khawpui thang zelah University te a awm tak avangin ngaimawh a hlawh ta mai nia an hriat thu an sawi a. Traffic ti 'jam' tu chu FCI truck te ni lovin Mizoram hmun danga phurchhuak leh tu truck te an ni zawk tih an sawi bawk. FCI thawktute chuan MZU atangin kudam sawn chungchangah eng mah ngenna an la dawnglo niin an sawi bawk a. "Buhfai hi duh duhna kudam atanga pek theih a nih loh avangin Ramrikawn kudam hi khar ngawt chi a ni lo a, khar ta ila riltam tur an tam lutuk a, mipuite hi a tuartu tur kan ni zawk a ni," an ti bawk. Ramrikawn FCI Kudam atang hian district pali Mamit, Aizawl, Serchhip leh Champhai district hmun hrang hranga buhfai tur phurhchhuah thin a ni bawk a ni.