ZALEN July 24, 2026: Kawrthah North Village Council chuan vawiin khan Deen Dayal Upadhyay Panchayat Satat Vikas, 2025 hnuai ah "Clean & Green Panchayat," lawmman pakhatna an dawn lawmna an khuaah an buatsaih a, Chief Minister Lalduhoma chuan khuallian niin a telpui a. B. Lalchhanzova, Minister, I&PR chuan Chief Minister hi a tawiawm.

He huna thu a sawi naah tun hnaia India rama thil thleng chungchang sawiin Chief Minister chuan, "Sawrkar laipuiin FCRA Amendment kalpui a tum danah kan tana pawm theih loh a awm tih kan hria a, naktukah CCM leh MKHC hruaitute meeting kan neihpui ang a, he amendment an kalpuina tura kan duh dante central sawrkarah kan thlen dawn a ni. Kan thu thlente an pawm theih chuan kan MP ten tha takin Parliament-ah an thawhpui ang a, kan rawtna an pawm thei lo a nih erawh chuan an dodal dawn a ni," a ti.

Lalduhoma chuan NEET Exam paper leakout avangin India ram pumah thalaiten lungawilohna an lantir a, Aizawlah pawh niminah te, niminpiahahte thalaite an pung khawm tih a sawi a. Thalaite hi an thlawp thu leh he movement kal meka chawngheia nawrhna kalpuitu Sonam Wangchuk pawh an thlawp thu leh an tawrhpui thu a sawi bawk.